Polşanyň degişli resmileri soňky aýlarda Russiýanyň aňtaw gullugynda işlemekde güman edilýän 55 adamyň tussag edilendigini habar berdiler. Ol bolsa öň habar berlen sekiz görkezijiden ep-esli köp.
Sişenbe güni Polşanyň ýörite hyzmatlaryny utgaşdyrýan ministriň metbugat sekretary Ýasek Dobžinskiý has giňişleýin we biri-biri bilen baglanşykly derňewiň şol sanyň artmagyna sebäp bolandygyny mälim etdi. Ýöne kazyýet işi ýa-da aýyplamalar barada jikme-jik maglumat bermedi.
Şol gün irden ýurduň premýer-ministri Donald Task Içerki howpsuzlyk gullugynyň (ABW) beýleki hyzmatlar bilen bir hatarda ýurduň dürli sebitlerinde 8 adamy sabotaž aksiýalaryny amala aşyrmak üçin taýýarlyk görmekde aýyplanyp göz tussaglygyna alynandygyny habar berdi.
Task X platformasyndan beren beýanatynda, kazyýet işleriniň dowam edýändigini we goşmaça amaly çäreleriň görülýändigini aýtdy.
Ýasek Dobžinskiýniň pikiriçe, tussag edilenler Russiýanyň aňtaw işleri bilen baglanyşykly birnäçe aýry we köptaraplaýyn derňewiň bir bölegidir. Olaryň arasynda Polşada we Rumyniýada içalylykda güman edilip 16-njy oktýabrda Warşawanyň golaýynda tussag edilen 21 ýaşly Ukrainanyň raýaty Danylo H. hem bar. Bu tussaglyk Rumyniýanyň aňtaw gullugy (SRI) bilen hyzmatdaşlykda amala aşyryldy.
