Ýewropa Bileleşiginiň Daşarky gatnaşyklardan we howpsuzlykdan jogapkär ýokary wekili Kaža Kallas, duşenbe güni beren beýannamasynda, ÝB-niň Gaza ylalaşygyna goldaw bermek maksady bilen çarşenbe günü Gaza bilen Müsüriň arasynda ýerleşýän Rafah gümrük geçelgesine gözegçilik etmek maksady bilen raýat missiýasynyň gaýtadan öz işine başlajakdygyny aýtdy.
Kallas Hamasyň ylalaşygyň çäginde ysraýylly ýesirleri boşatmagyndan soň X sosial media platformasy arkaly beren habarnamasynda “ÝB öz üstüne düşýän jogapkärçiligi ýerine ýetirmäge taýar”diýdi.
27 ýurtdan ybarat gurama, 2005-nji ýylda Rafah gümrük geçelgesinde gözegçiligiň ýola goýulmagy üçin raýat missiýasyny döredipdi. Emma missiýanyň işi Palestinli söweşjeň topar Hamasyň Gazanyň gözegçiligini ele geçirmeginden 2 ýyl soň bes edilipdi.
ÝB-niň gözegçilik missiýasy EUBAM Italiýadan, Ispaniýadan we Fransiýadan geljek polis güýjüni öz içine alýar.
Şol missiýa ýanwar aýynda sebite ugradylypdy, emma mart aýynyň başynda yzyna dolanmaly boldy.
Duşenbe güni ýesirleriň boşadylmagyna kanagatlanma bildiren Kallas, ABŞ-nyň Prezidenti Donald Trampyň ylalaşygyň gazanylmagynda uly rol oýnandygyny belledi.
Ýewropa Komissiýasynyň başlygy Ursula fon der Laýen bolsa duşenbe güni Şarm Al-Şeýh şäherinde geçirlen we söweşiň bes edilmeginde uly rol oýnan Gaza sammitini “taryhy öwrülşik nokady” hökmünde häsiýetlendirdi.
Ursula fon der Laýen “Ýewropa Komissiýasy ABŞ-nyň, Kataryň, Müsüriň we Türkiýäniň töwellaçylyk etmeginde gazanylan ylalaşyga we parahatçylyk meýilnamasyna doly goldaw berýär” diýdi.
Müsüriň Şarm A-Şeýh şäherinde geçirilýän Gaza sammitine ÝB-niň adyndan Ýewropa Geňeşiniň başlygy Antonio Kosta gatnaşýar.
