Ysraýyl zamun alnan 4 adamyň jesedini alandan soň Rafanyň üsti bilen ynsanperwer kömekleriň geçirilmegine rugsat berdi, agentlikler Gazadaky göçürilen admlaryň arasynda açlygyň artandygy we ynsanperwer kömegiň gijikdirilýändigi barada duýduryş berdiler.
Ysraýylyň KAN döwlet ýaýlym organy tarapyndan berlen habara görä, zamun alnan 4 adamyň jesediniň yzyna gaýdyp berilmeginden soň Ysraýyl Gaza bilen Müsüriň arasyndaky Rafah gümrük geçelgesini açmak we Gaza ynsanperwer kömeginiň geçirilmegine rugsat bermek kararyna geldi.
Habarda Ysraýylyň Hamasa garşy meýilleşdirilen we sebite girýän kömek ulaglarynyň sanyny azaltmagy öz içine alýan çäreleri ýatyrandygy aýdylýar.
ÝUNISEF-iň metbugat sekretary Rikardo Pires: "Serhet geçelgeleriniň hemmesi açyk bolmaly. Rafah näçe uzak wagt ýapyk bolsa, esasan hem zolagyň günortasynda ýaşaýan ýerlerinden göçürlen adamlar Gazada has köp ejir çeker" diýdi.
ABŞ-nyň prezidenti Donald Tramp duşenbe güni Ysraýylyň Gazadaky söweşiniň bes edilendigini yglan etdi. Global açlyk gözegçilik guramasy ýüzlerçe müň adamyň açlyk howpy astyndadygy barada duýduryş berdi.
Halkara Gyzyl Haç komitetiniň metbugat sekretary Kristian Kardon sişenbe güni Ženewada žurnalistlere: "Biz henizem birnäçe ýük awtoulagynyň gelýändigini we bu ýük awtoulaglaryna gelýän mähelläniň ynsanperwerlik ülňülerine düýbünden laýyk däl ýagdaýda hereket edýändigini görýäris" diýdi.
BMG Bütindünýä Azyk Maksatnamasy sişenbe güni beren beýanatynda, sebite dynç günlerinden bäri 137 ýük awtoulagynyň gelendigini habar berdi. Kömek agentlikleri birnäçe hepde bäri kömek almadyk Gazadaky 400000 adama tiz kömek ibermegi maksat edinýärler.
