Hytaý bilen Hindistan 2020-nji ýyldaky serhet çaknyşygy sebäpli dartgynlaşan gatnaşyklary dikeltmek üçin seresaply ädim hökmünde, bäş ýyllyk arakesmeden soň ýekşenbe güni göni täjirçilik gatnawlaryny ýola goýdular.

IndiGo-nyň ilkinji uçary Kalkutta şäherindäki Netaji Subhas Çandra Bose halkara howa menzilinden uçup, Guançžou gondy we düzüminde 176 ýolagçy bardy. Hindistanyň iň uly howa ýollary kärhanasy iki şäheriň arasynda gündelik göni uçar saparlaryny amala aşyrar.

Täze-Deli bu ädimiň “adamlaryň arasyndaky gatnaşyklary artdyrjakdygyny” we “ikitaraplaýyn gatnaşyklaryň tapgyrlaýyn kadalaşdyrylmagyny goldajakdygyny” aýtdy.

Şanhaý bilen Täze-Deli şäherlerini birleşdirýän ikinji ugur 9-njy noýabrda işe giriziler we hepdede üç gezek amala aşyrlar.

Aziýanyň iki ägirdiniň arasyndaky howa gatnawy 2020-nji ýylyň başynda Kowid-19 pandemiýasynyň başlamagy bilen togtadyldy. Bu ýagdaý şol ýylyň iýun aýynda Galwan jülgesinde 20 hindi esgeriniň we belli bolmadyk sanda hytaýly esgeriň ölmegine sebäp bolan ölüm howply çaknyşyklardan soň dowam etdi.

2024-nji ýylyň oktýabr aýynda Hakyky gözegçilik liniýasy (LAC) boýunça dartgynlylygy azaltmaga gönükdirilen ylalaşykdan soň gatnaşyklar bölekleýinkadalaşdy. Uçuşlaryň dikeldilmegi dünýäniň iň köp ilatly iki ýurdunyň arasyndaky gatnaşyklary kadalaşdyrmak üçin simwoliki, ýöne möhüm ädim hökmünde kabul edilýär.