Türkiýe Ysraýylyň Günbatar Şeriany anneksirlemäge synanşmagyny ýazgardy
Türkiýäniň BMG-nyň ýanyndaky hemişelik wekili ilçi Ahmet Ýyldyz, BMG-nyň Howpsuzlyk geňeşinde geçirlen maslahatda ABŞ-nyň Prezidenti Trampyň 20 maddalyk parahatçylyk meýilanmasynyň durmuşa geçirilmegi üçin çagyryş etdi.
Türkiýäniň BMG-nyň ýanyndaky hemişelik wekili, Ysraýylyň basyp alyşlyk astyndaky Günbatar Şeriany anneksirlemegi maksat edinýändigini aýtdy.
Türkiýäniň BMG-nyň ýanyndaky hemişelik wekili ilçi Ahmet Ýyldyz, çarşenbe güni Palestinde başdan geçirilýän soňky wakalar boýunça BMG-nyň Howpsuzlyk geňeşinde geçirlen ýokary derejeli maslahatda eden çykyşynda, Ysraýylyň ünsleriň Gaza gönügen günlerinde basyp alyşlyk astyndaky Günbatar Şeriada bikanun ýagdaýda gurýan ilatly ýerleriniň sanyny artdyrýandygyny aýtdy.
Ahmet Ýyldyz “Türkiýe BMG-nyň Howpsuzlyk geňeşiniň 2803 belgili kararynyň we ABŞ-nyň Prezidenti Donald Trampyň 20 maddalyk parahatçylyk meýilnamasynyň doly ýerine ýetirilmegini talap edýär” diýdi.
Ylalaşygyň dowam etdirilmeginiň adam pidalarynyň öňüniň alynmagy, ynsanperwer kömeginiň halka ýetirilmegi we syýasy dialog üçin amatly şertiň döredilmegi taýdan diýseň möhümdigini nygtan Ýyldyz, hüjümleriň dowam etdirilmegini we ynsanperwer kömekleriniň çäklendirilmegini ýazgarýandyklaryny belledi.
Ahmet Ýyldyz Gaza berilýän ynsanperwer kömeginiň mukdarynyň artdyrylmalydygyny we bökdençlikleriň ortadan aýrylmalydygyny nygtady.
Ýyldyz gaýtadan dikeldiş etabynyň başlamagy üçin Ysraýylyň Gazadan dolulygyna çekilmelidigini we Türkiýäniň gaýtadan dikeldiş işlerinde uly jogapkärçiligi öz üstüne almaga taýardygyny aýtdy.
Ýyldyz, basyp alyşlyk astyndaky Günbatar Şeria meselesinde bolsa Ankaranyň Ysraýylyň anneksiýasyna garşydygyny ýene-de bir gezek nygtady.
Ahmet Ýyldyz, Ysraýylyň Günbatar Şeriadaky bir taraply çärelerini “halkara hukugynyň basgylanmagy” hökmünde häsiýetlendirdi.