Gyrgyzystanyň ýerli önümçiliginde öndürilen ilkinji emeli hemrasy älem giňişligine uçuryldy.

Gyrgyzystanyň Prezidentiniň Metbugat merkeziniň beýanatyna görä, ilkinji milli emeli hemra ABŞ-nyň Kaliforniýa ştatyndaky Wandenberg harby-howa güýçleri bazasyndan “SpaceX” kompaniýasynyň “Falcon 9” raketasy arkaly orbita çykaryldy.

ABŞ-da iş sapary bilen bolan Gyrgyzstanyň prezidenti Sadyr Japarow emeli hemranyň uçurylma dabarasyna gatnaşdy we bu taryhy pursada şaýat boldy.

Birleşen Arap Emirlikleri (BAE) bilen bilelikdäki tagallalaryň netijesinde älem giňişligine uçurylan ilkinji milli emeli hemranyň Gyrgyzstanyň ykdysadyýetinde we daşky gurşawyň gözegçiliginde möhüm rol oýnajakdygy aýdyldy.

Emeli hemra oba hojalyk ýerleriniň we öri meýdanlarynyň ýagdaýyny, gurakçylyk howplaryny we oba hojalyk hasylyny gözegçilikde saklamak üçin ýokary çözgütli optiki datçikleri ulanar.

Şeýle hem, bu emeli hemra Gyrgyzystan üçin möhüm bolan buzluklary, suw serişdelerini, derýalary we daşky gurşawyň üýtgeşmelerini gözegçilikde saklamaga, şeýle hem tebigy betbagtçylyklaryň töwekgelçiligini öňünden aýtmaga kömek eder.

Hemranyň ähli gözegçiligi we maglumat akymy paýtagt Bişkekde döredilen Ýerüsti dolandyryş merkezinden dolandyrylar.