ABŞ Günorta Afrikada geçiriljek G-20 sammitine gatnaşmaz

ABŞ-nyň Prezidenti Donald Tramp amerikan hökümetiniň agzalarynyň noýabr aýynda Günorta Afrikada geçiriljek G-20 sammitine gatnaşmajakdygyny mälim etdi.

Tramp Günorta Afrikada akýagyzlaryň sistematiki ýagdaýda öldürilýändigi hakynda öňe sürülýän garaýyşlary ýene-de bir gezek gün tertibine getirdi.

Tramp sosial media platformasy Trut Sosial arkaly beren habarnamasynda “G-20-niň Günorta Afrikadaky tutumy diýseň utandyryjy. Adam hukuklary basgylanmaga dowam edýändigi sebäpli amerikan hökümetiniň agzalary sammite gatnaşmaz” diýdi.

Tramp sentýabr aýynda beren beýannamasynda, G-20-niň sammitine Wise-prezidenti Wansyň gatnaşjakdygyny mälim edipdi.

ABŞ-nyň Prezidenti G-20-niň 2026-njy ýylda Maýamide geçiriljek sammitini golf desgasynda geçirmegini meýilleşdirýär.

Tramp, çarşenbe güni beren beýannamasynda, Günorta Afrikanyň G-20-den çykarylmalydygyny we ýurtda noýabr aýynda geçiriljek sammite gatnaşmajakdygyny aýtdy.

Tramp Maýamide geçirlen Amerikan işewürler forumynda eden çykyşynda “Günorta Afrika indi G-leriň içinde bolup bilmez, sebäbi şol ýurtda has erbet wakalar başdan geçirilýär” diýdi.

Tramp noýawr aýynyň 22-23-i aralygynda Ýohannesburg şäherinde geçiriljek G-20 sammitini nazarda tutmak bilen “Gitmeýärin. Ýurdumyza ol ýerde wekilçilik etmerin”diýdi.

Tramp Günorta Afrikany birnäçe gezek ekin meýdanlaryny ele geçirýändigini we käbir gatlaklara erbet daraýandygyny öňe sürdi we muny adam hukuklarynyň basgylanmagy hökmünde häsiýetlendirdi.

Donald Tramp akýagyzlara erbet daralýandygy sebäpli ABŞ-nyň Günorta Afrika berýän kömekleriniň kesilmegi barada görkezme beripdi.

Günorta Afrikanyň hökümeti bolsa Trampyň garaýyşlarynyň asylsyzdygyny mälim etdi.