ABŞ-nyň köpçülikleýin habar beriş serişdeleriniň berýän habaryna görä, amerikaly esgerler Gaza ylalaşygynyň durmuşa geçirilmegine gözegçilik etjek köp milletly güýjüň hatarynda iş alyp barmak üçin şenbe güni Ysraýyla gelmäge başlady.

Amerikaly 2 resmi ABC Nýus kanalyna beren beýannamasynda 200-e golaý amerikaly esgeriň ylalaşyga gözegçilik etmekden jogapkär utgaşyklyk merkezini gurmak üçin sebite gitjekdigini habar berdi.

Şol topar logistiki goldaw, howpsuzlyk, transport we inženerçilik ýaly ugurlarda iş alyp barar.

Habarda amerikan güýçleriniň Ysraýylda iş alyp barjakdygy we Gaza girmejekdigi nygtaldy.

ABŞ-nyň Merkezi güýçler serkerdeligi CENTCOM-yň başlygy admeral Kooperiň ýolbaşçylygynda iş alyp barjak topar sebit ýurtlarynyň harby toparlary bilen utgaşykly ýagdaýda işleşer.

Trampyň 20 maddalyk teklibi

ABŞ-nyň Prezidenti Donald Trampyň çarşenbe güni beren beýanamasynda Ysraýyl bilen Hamasyň 29-njy sentýabrda teklip edilen 20 maddalyk meýilnamanyň birinji tapgyryny kabul etmeginden soň amerikan güýçleriniň sebite ugradyljakdygy habar berlipdi.

Ylalaşyga görä, Hamas ysraýylly ähli ýesirleri boşadar, Ysraýylyň hem tussaglykdaky 2 müň palestinlini boşatmagyna garaşylýar. Ysraýyl şeýle hem tapgyrlaýyn ýagdaýda Gazadan çekiler.

Ylalaşygyň ikinji tapgyrynda bolsa Gazada täze dolanşyk ulgamy gurlar. Hamasyň şol ulgama degişli edilmejekdigi habar berildi.

Gazada palestinlilerden we musulman ýurtlaryň esgerlerinden ybarat howpsuzlyk güýjüniň iş alyp barmagy we Hamasyň ýaragsyzlandyrylmagy maksat edinilýär.

Ysraýylyň 2023-nji ýylyň oktýabr aýyndan bäri Gaza guran hüjümlerinde esasy bölegi zenanlardan we çagalardan ybarat 67 müň 200 palestinli ýogaldy.

Hüjüm sebäpli Gaza harabalyga öwrüldi.