Türkmenistan Garaşsyzlygynyň 35 ýyllygyny paýtagt Aşgabat şäherinde geçirilen joşgunly we ajaýyp çäreler bilen belläp geçdi.
Türkiýeden we dünýäniň dürli künjeginden köp sanda myhmanyň gatnaşandabaralarda iki ýurduň arasyndaky dostluk we goranyş senagatyndaky hyzmatdaşlyk ýene-de bir gezek öň hatara çykdy.
Aşgabatda dabaraly ýöriş geçirildi
Baýramçylyk dabaralary paýtagt Aşgabat şäherindäki Köpetdag dagynyň eteginde ýerleşýän Döwlet tribunasynda geçirildi. Prezident Serdar Berdimuhamedowyň tribunada öz ornuny almagy bilen başlan dabarada biri-birinden ajaýyp çykyşlar boldy.
Ahalteke atlarynyň ýoldaşlyk etmeginde dabara meýdançasyna getirilen Türkmenistanyň baýdagy döwlet senasy ýerine ýetirilýän mahaly baýdak sütünine galdyryldy.
Ministrleriň, daşary ýurt missiýalarynyň ýolbaşçylarynyň we diplomatik wekilleriň tomaşa eden ýörişde harby bölümler, döwrebap sowutly ulaglar we ýurduň meşhur ahal-teke atlary görkezildi.
Ýörişiň iň üns çekiji elementleriniň biri hem Türkiýeden satyn alnan Otokar Cobra sowutly ulaglarynyň we Bayraktar TB2 uçarmansyz howa ulaglarynyň harby ýörişe gatnaşmagy boldy.
Türkiyäniň Prezidenti Erdoganyň gutlagy we COP31 sammitine çakylygy
Türkiýäniň Prezidenti Rejep Taýýip Erdogan Türkmenistanyň Garaşsyzlygynyň 35 ýyllygy mynasybetli Türkmenistanyň Prezidenti Serdar Berdimuhammedowa we Türkmen halkynyň Milli Lideri Gurbanguly Berdimuhammedowa gutlag hatlaryny iberdi.
Prezident Erdogan gutlag hatlarynda iki ýurduň umumy taryhyny, dinini we medeniýetini nygtap, gatnaşyklaryň köptaraplaýyn platformalarda, esasanam Türki Döwletleriň Guramasynyň çäginde has-da çuňlaşjakdygyna ynanýandygyny bildirdi.
Erdogan şeýle hem Türkmenistanyň Prezidenti Berdimuhammedowy Antalýada geçiriljek COP31 Liderler Sammitine hormatly myhman hökmünde çagyrdy.
Türkiýäniň Aşgabat şäherindäki Adatdan daşary we doly ygtyýarly ilçisi Şener Jebeji dabara gatnaşyp, Türkiýäniň Türkmenistanyň garaşsyzlygyny ykrar eden we ol ýerde ilçihana açan ilkinji ýurt bolandygyny belläp: "Biz türkmen doganlarymyzyň bu aýratyn gününi belläp geçýäris. Biz Türkmenistanyň garaşsyzlygyndan bäri gazanan ösüşlerine buýsanýarys we ony hemişe goldap durýarys" diýdi.
Berdimuhamedow: "Garaşsyzlyk biziň iň uly gymmatlygymyzdyr"
Gutlag ýüzlenmesini çap eden Prezident Serdar Berdimuhammedow garaşsyzlygy ýurduň esasy gymmaty we durnuklylygyň we agzybirligiň nyşany hökmünde häsiýetlendirdi.
Ol soňky 35 ýylyň dowamynda ykdysady, sosial, senagat we infrastruktura ugurlarynda uly öňegidişlikleriň gazanylandygyny belläp, Türkmenistanyň hemişelik bitaraplyk syýasatyna laýyklykda parahatçylyga, howpsuzlyga we dostluga esaslanýan daşary syýasatyny dowam etdirjekdigini nygtady.
Garaşsyzlygyň 35 ýyllygy mynasybetli günä geçişlik we ýaşamak üçin rugsatnama
Garaşsyzlygyň 35 ýyllygy mynasybetli geçirilýän dabaralaryň çäginde ynsanperwerlik çäreleri boýunça hem ädimler edildi:
• 1054 raýatyň galan tussaglyk jezalary we goşmaça jezalary bagyşlandy
• 7 dürli ýurtdan 146 adama hemişelik ýaşamak üçin rugsatnama berildi.
Agşam dürli çäreler we dabaralar bilen dowam eden umumy çäreler türkmen halkynyň gatnaşmagy bilen gijä çenli dowam etdi.
