Ysraýyl Gazada ýaraşygyň düzgünini bozdy we iki palestinalyny öldürdi

Harby çeşmeleriň maglumatyna görä, Ysraýylyň goşuny Gazanyň günortasyndaky Rafahda iki palestinalyny öldürip, oktýabr aýynda güýje giren ot açmagy bes etmek baradaky ylalaşygyň düzgünini ýaňadandan bozdy.

Ysraýylyň goşuny Rafahyň günbataryna tanklary ýerleşdirendigini, ol ýerde ot açandygyny we howa hüjümlerini amala aşyrandygyny mälim etdi.

Ýewreý dilinde çap edilýän “Israel Hayom” gazeti çaknyşyklarda iki ysraýylly esgeriň ýeňil ýagdaýda ýaralanandygyny habar berdi.

Hamas hüjümleri ýazgaryp, olary "açyk düzgün bozma" hökmünde häsýetlendirdi we Ysraýyla olary bes etmegi üçin basyş edilmegine çagyrdy.

Hamas araçylardan we kepil ýurtlardan "Ysraýylyň gaýtalanýan kanun bozmalaryny" ýazgarmagyny talap etdi we şol bir wagtyň özünde Benýamin Netanýahuny hüjümleri "ýalan we toslama esaslarda" dolandyrmakda aýyplady.

Hamas mundan başgada Ysraýyla düzgün bozmalaryň öňüni almak üçin basyş edilmegini, ot açmagy bes etmek baradaky düzgünleriň berjaý edilmegini, Rafah serhet geçelgesiniň iki tarapda hem gaýtadan açylmagyny, ynsanperwer kömekleriň we ýaşaýyş serişdeleriniň girmegine rugsat berilmegini we ylalaşygyň ikinji tapgyrynyň dessine ýerine ýetirilmegini talap etdi.

Ýaraşyk bilen bagly gepleşikler

Şol bir wagtyň özünde, Hamas toparynyň wekiliýeti ýaraşygyň indiki tapgyry barada gepleşikler geçirmek üçin Müsüriň paýtagty Kair şäherine bardy.

Hamas beren beýanatynda wekiliýete Gazadaky hereketiň lideri Halil al-Haýýanyň ýolbaşçylyk edýändigini aýtdy.

Beýanatda gepleşikleriň ot açmagy bes etmek baradaky ylalaşygyň ýerine ýetirilmeginiň tamamlamaga; birinji tapgyryň tamamlanmadyk ädimlerini ara alyp maslahatlaşmaga we Gaza bilen Müsüriň arasyndaky Rafah serhet geçelgesiniň ikitaraplaýyn ýagdaýda gaýtadan açylmagyna gönükdiriljekdigi aýdylýar.

Hamas şeýle hem gepleşiklerde ylalaşygyň ikinji tapgyryna geçmegi çaltlandyrmak, şol sanda dolanşyk komitetini döretmek we Ysraýylyň Gazadan çykmagyny tamamlamak meseleleriniň ara alnyp maslahatlaşyljakdygyny aýtdy.

Ysraýyl 2023-nji ýylyň oktýabr aýyndan bäri Gazadaky genosidinde aglabasy zenanlardan we çagalardan ybarat 71 müňden gowrak palestinalyny öldürdi. Ysraýyl şeýle hem gabawdaky territoriýanyň köp bölegini weýran etdi we tutuş ilatyny göçürdi.