Russiýanyň Daşary işler ministrligi duşenbe güni Ukrainadaky urşy bes etmek üçin islendik parahatçylyk şertnamasynyň dowamly çözgüt tapmagy üçin konfliktiň "düýp sebäplerini" çözmelidigini aýtdy. Bu beýanat Ýewropa Bileleşigi Moskwa garşy täze sanksiýalar bukjasyny taýýarlaýan mahaly berildi.
Russiýanyň Daşary işler ministrliginiň metbugat sekretary Mariýa Zaharowa döwlet tarapyndan goldanýan TASS habar gullugyna: "Biz konfliktiň düýp sebäplerini uzaltmak däl-de, tersine, bu netijäniň düýpli, uzak möhletli we parahatçylygy kepillendirýän çözgüt bolmagyny üpjün etmegiň tarapdary" diýdi.
Russiýa garşy täze sanksiýalar
Bu beyanat ÝB-niň Daşary işler ministrleriniň Lýuksemburgda maslahat geçiren mahaly berildi. ÝB-niň daşary syýasatdan jogapkär resmisi Kaýa Kallas, Bileleşigiň Russiýa garşy sanksiýalarynyň 19-njy tapgyrynyň şu hepde tassyklanmagynyň ähtimaldygyny aýtdy.
Şeýle hem Kallas ABŞ-nyň prezidenti Donald Tramp bilen Russiýanyň prezidenti Wladimir Putiniň Budapeştde geçirip biljek duşuşygyny tankytlady we bu pikiri “ýakymsyz” waka diýip häsiýetlendirdi.
2022-nji ýylyň fewral aýynda Russiýa bilen Ukrainanyň arasynda uruş başlanyndan bäri, ÝB Moskwanyň maliýe, energiýa we goranyş pudaklaryna, şeýle hem Kremle ýakyn ýolbaşçylar we oligarhlara garşy ençeme sanksiýa bukjasyny girizdi.
