Russiýanyň öňki prezidenti Dmitriý Medwedew duşenbe güni Ýewropanyň Russiýa garşy urşa töwekgelçilik edip bilmejekdigini, emma onuň ýolbaşçylary şeýle ýalňyşlyga ýol berse, bu urşuň köpçülikleýin gyryş ýaraglarynyň ulanylmagyna çenli ýitileşip biljekdigini aýtdy.
Dmitriý Medwedew Telegram hasabyndan beren beýanatynda, Russiýanyň olar ýaly urşa, esasan hem “sowuk we garry Ýewropa” bilen urşa zerurlygynyň bolmandygyny beýan etdi.
Dmitriý Medwedew: “Ýewropa Russiýa garşy urşa töwekgelçilik edip bilmez, emma ondada öldüriji betbagtçylyk hemişe mümkindir. Şeýle konfliktiň köpçülikleýin gyryş ýaraglarynyň ulanyljak urşa öwrülmek töwekgelçiligi dolulygyna dogrudyr” diýip belledi.
Häzirki wagtda Russiýanyň Howpsuzlyk Geňeşiniň başlygynyň orunbasary wezipesini eýeleýän Medwedew, Ýewropa ýurtlarynda Russiýa bilen geljek bäş ýylyň dowamynda urşuň bolup biljekdigi baradaky çaklamalaryň "bolmaly däldigini" aýtdy we muny Moskwanyň bähbitlerine ters gelýän ýagdaý hökmünde häsiýetlendirdi.
Şeýle hem ol Ýewropanyň ykdysadyýetiniň "gowşak we ABŞ-a garaşly" bolandygyny öňe sürdi we materigi "öz şahsyýetini ýitirip, agressiw migrantlaryň arasynda eremekde" aýyplady.
2008-2012-nji ýyllar aralygynda Russiýanyň prezidenti bolup işlän Medwedew, Ukraina urşy döwründe Günbatar hökümetlerine garşy birnäçe ýiti çykyşlary bilen tanalýar.
Medwedew soňky beýanatyny Ýewropada goranyş çykdajylary we howpsuzlyk taýýarlygy baradaky barha güýçlenýän çekişmelerden soň berdi.
