Russiýanyň Daşary işler ministrligi, Ýewropaly syýasatçylary we Ýewropanyň köpçülikleýin habar beriş serişdelerini ABŞ-nyň ýolbaşçylygynda başladylan Ukraina parahatçylyk tagallalaryny bökdemekde günäkärledi.
Maria Zaharowa çarşenbe güni Radio Sputnige beren beýannamasynda, Ýewropanyň başladan informasiýa hüjümleriniň çaknyşyklaryň syýasy we diplomatiýa taýdan çözülmegi ähtimallygyny bozmagy maksat edinýändigini belledi.
Duşenbe güni ABŞ-nyň Gury ýer güýçleriniň serkerdesi Dan Driskoll Abu Dabide rus ýolbaşçylar bilen duşuşdy we täze gepleşik tapgyryna ýolbaşçylyk etdi.
ABŞ-nyň Gury ýer güýçleriniň serkerdesi Dan Driskoll dowam edýän çaknyşyklaryň bes edilmegi maksady bilen Ukrainanyň harby razwetka gullugynyň başlygy Kyrylo Budanow bilen hem duşuşdy.
ABŞ-nyň we Ukrainanyň wekiliniň Prezident Donald Trampyň jedelleşikli 28 maddalyk parahatçylyk meýilnamasy hakynda pikir alyşandygy nygtaldy.
Prezident Tramp sişenbe güni Trut Sosial platformasy arkaly beren habarnamasynda “Parahatçylyk meýilnamasy meselesi boýunça ýörite wekilim Stew Witkofyň Prezident Putin bilen Moskwada, Gury ýer güýçleriniň serkerdesi Dan Driskollyň hem ukrainanyn wekili bilen duşuşmagy üçin görkezme berdim” diýdi.
Ak Tam gepleşiklerde uly öňe gidişligiň edilendigini mälim etdi, emma parahatçylyk şertnamasyndan öň käbir ynjyk meseleleriň çözülmelidigi barada duýduryş berdi.
Fransiýanyň Prezidenti Emmanuel Makron bolsa, Moskwanyň meseläni ara alyp maslahatlaşmak ýaly niýetiniň ýokdygyny belledi.
