ABŞ-nyň prezidenti Donald Trampyň Gaza baradaky meýilnamasynyň birinji tapgyry baradaky şertnama penşenbe güni Grinwiç sagady bilen irden 09: 00-da gol çekiler diýlip garaşylýar.

Bir habar çeşmäniň “Roýter” habar gullugyna beren maglumatyna görä, şertnama gol çekilenden soň Gazadaky ýaraşyk şertnamasynyň güýje girmegine garaşylýar.

"The Jerusalem Post" gazetiniň habaryna görä Katar, Müsür, ABŞ we Türkiye kepillendiriji ýurtlar hökmünde Gazadaky parahatçylyk şertnamasyna gol çekdi.

Ysraýyl we Palestinanyň garşylyk topary Hamas, Tel-Awiwiň Gazadaky söweşini bes etmek üçin köpden bäri garaşylýan ýaraşyk şertnamasynyň birinji tapgyrynda ylalaşandyklaryny habar berdiler. Bu uruş 67000-den gowrak palestinalynyň ölmegine we Ýakyn Gündogaryň ýaňadandan şekillenmegine sebäp boldy.

Şeýle-de bolsa, Gazanyň raýat goranmak gullugy Ysraýyl bilen Hamasyň ýaraşyk meýilnamasy barada ylalaşandyklaryny mälim edenlerinden soň hem sebitde birnäçe hüjümiň bolandygyny habar berdi.

Beýleki tarapdan Ysraýylyň goşuny penşenbe güni beren beýanatynda sebitde ýerleşmegini dowam etdirýändigini we mümkin bolup biljek operatiw özgerişlere taýýardyklaryny beyan etdi.

Ylalaşyk üç esasy meseläni öz içine alar: Ysraýylly tussaglylaryň we palestinaly tussaglylaryň boşadylmagy, Ysraýylyň goşunlarynyň kesgitlenen ýerlerden yza çekilmegi we ençeme ýyllap dowam eden gabawdan we uruşdan soň Gaza gyssagly ynsanperwer kömegiň berilmegi.

Hamasyň içindäki bir habar çeşmäniň AFP habar gullugyna beren habaryna görä, Hamas şertnamanyň birinji tapgyrynyň çäginde 2000-e golaý palestinaly tussagly üçin 20 sany ysraýylly tussaglyny çalşar.

Gepleşiklerden habardar bolan bir çeşme, alyş-çalyş şertnamanyň durmuşa geçirilenden 72 sagadyň dowamynda geçiriljekdigini aýtdy.