Türkiyäniň Kommunikasiýalar edarasynyň başlygy Burhanettin Duran ýekşenbe güni beren beýanatynda, Owganystan bilen Pakistanyň arasyndaky ýaraşyk şertnamasyndan hoşaldyklaryny belledi we Ankaranyň, esasanam iki “dogan ýurt” arasynda ynamy ýola goýmak, dawalary çözmek we dowamly parahatçylygy gazanmak tagallalaryna goldaw berjekdigini aýtdy.

Duran, NSosyal atly türk sosial media platformasyndan beren beýanatynda, Türkiye we Katar tarapyndan araçylyk edilmeginde gazanylan ýaraşygy sebitdäki parahatçylyk we durnuklylyk üçin "örän gymmatly ädim" hökmünde häsiýetlendirdi.

Burhanettin Duran: "Taraplaryň gepleşik we umumy düşünje esasynda birleşip, dartgynlygy hyzmatdaşlyga çalyşmagy sebitdäki parahatçylyga we abadançylyga tarap möhüm ädimdir" diýdi.

Pakistan anna güni agşam Owganystanyň Paktika welaýatynda howa hüjümlerini amala aşyrandan soň serhet dartgynlygy hasam güýçlendi. Kabul şol hüjümlerde köp sanda asuda ilatyň ölendigini habar berdi. Şol günlerde iki tarapyň resmileri Doha şäherinde gepleşikler geçirdiler.

Ýekşenbe güni irden Pakistan we Owganystan tiz wagtda güýje girjek ýaraşyk şertnamasyny kabul edendiklerini tassykladylar.