Gruziýada harby ýük uçarynyň heläkçilige uçramagy netijesinde 20 türk harby şehit boldy
Azerbaýjandan Türkiyä tarap barýan C-130 kysymly harby ýük uçary Azerbaýjan-Gruziýa serhediniň golaýynda ýere gaçdy.
Türkiyäniň Goranmak ministrligi sişenbe güni Gruziýada Türkiyäniň harby ýük uçarynyň heläkçilige uçramagy netijesinde 20 esgeriň şehit bolandygyny habar berdi.
Ministrligiň çarşenbe güni beren beýanatynda: "Gözleg-halas ediş we heläkçiligi derňeýän topar Azerbaýjan-Gruziýa serhedinde heläkçilige uçran harby ýük uçarymyzyň galyndylaryny sagat 06:30-da Gruziýanyň degişli ýolbaşçylary bilen bilelikde barlamaga başlandy" diýilýär.
Düzüminde 20 harby bolan Türkiyäniň C-130 kysymly harby ýük uçary Azerbaýjandan Türkiyä barýarka heläkçilige uçrady.
Ministrlik ýogalan 20 harbynyň atlaryny aýan etdi.
Prezident Rejep Taýýip Erdogan sişenbe güni Azerbaýjanyň Prezidenti İlham Aliýew we Gruziýanyň Premýer-ministri Irakli Kobahidze bilen dowam edýän gözleg we halas ediş işleri bilen baglanyşykly wakalary ara alyp maslahatlaşmak üçin aýry-aýry telefon arkaly söhbetdeşlik geçirdi.
Prezident Erdogan paýtagt Ankarada geçirilen çärede çykyş edip, şehitler üçin gynanç bildirdi.
Heläkçiligiň sebäbi entek anyklanmady.
Heläkçilikden soň, dünýäniň dürli ýurtlary we liderler Türkiyä raýdaşlyk bildirdiler.