Ukrain resmilerinden biri Russiýanyň gündogar Ukrainadaky Bogoduhiw şäherine guran hüjüminde dört adamyň, şol sanda çaganyň ölendigini habar berdi.

Sebitiň harby resmisi Oleg Synegubowyň aýtmagyna görä, Russiýanyň hüjümi netijesinde iki sany oglanjyk we iki ýaşly gyzjagaz ýogaldy.

Synegubow Telegramda çagalar bilen bir öýde bolýan 34 ýaşly bir adamyň ölendigini, 74 ýaşly bir aýalyň hem ýaralanandygyny we lukmançylyk bejergisine alnandygyny mälim etdi.

Synegubow ozalky beýanatynda hüjümde 35 ýaşly göwreli aýalyň hem ýaralanandygyny aýdypdy.

Bogoduhiw şäheri Harkow sebitinde ýerleşýär. Ol ýerde rus harby güýçleri soňky döwürde ulag we energiýa infrastrukturasyna guraýan hüjümlerini güýçlendirdiler.

Sebitiň gubernatory Andreý Boçarow çarşenbe güni Russiýanyň günortasyndaky Wolgograd welaýatynda gije guralan dron hüjüminiň senagat desgasynda ýangynyň başlamagyna sebäp bolandygyny aýtdy we Telegramda: "Russiýanyň Goranmak ministrliginiň howa goranyş bölümleri Wolgograd sebitinde energiýa we raýat infrastruktura desgalaryna dronlar bilen amala aşyrylan uly terrorçylykly hüjümi yzyna serpikdirýär"diýip ýazdy.

Boçarow hüjümiň ýaşaýyş jaýyna zeper ýetirendigini we dronyň galyndylarynyň çagalar bagynyň howlusyna düşendigini aýtdy, emma çekilen pida barada maglumat berilmedi.