Ysraýylyň harby goşuny, Halkara Gyzyl Haç guramasynyň gabaw astyndaky Gazada ysraýylly 4 ýesiriň tabydyny kabul edip alandygyny mälim etdi.

Harby goşun tarapyndan berlen beýannamada, “Gyzyl Haç tarapyndan berlen maglumata görä, içinde ýogalan ýesirleriň galyndylary bolan 4 tabyt kabul edip alnypdyr we Ysraýylyň Gazadaky howpsuzlyk güýçlerine tabşyrylmagy üçin ýola çykypdyr” diýildi.

Harby goşun tarapyndan ozal berlen beýannamada, Gyzyl Haçyň ysraýylly birnäçe ýesiriň tabydyny kabul edip almak üçin Gazanyň demirgazygyna tarap ugrandygy nygtalypdy.

Palestinli topar duşenbe güni Gazadaky ylalaşygyň çäginde ysraýylly 4 ýesiriň tabydyny tabşyrypdy.

Hamas geçen hepde gazanylan ylalaşygyň birinji tapgyrynyň çäginde duşenbe güni ertiriň irki sagatlarynda palestinli 2 müňe golaý ýesiriň boşadylmagynyň öwezine ysraýylly 20 ýesiri boşadypdy.

ABŞ-nyň Prezidenti Donald Tramp geçen hepde Ysraýyl bilen Hamasyň Gazada hüjümleriň bes edilmegi, ysraýylly ähli ýesirleriň  we palestinli tussaglylaryň boşadylmagy we Ysraýylyň howpsuzlyk güýçleriniň tapgyrlaýyn ýagdaýda sebitden çekilmegi üçin 29-njy sentýabrda hödürlenen meýilnamanyň birinji tapgyryny kabul edendigini mälim edipdi.

Meýilnamanyň birinji tapgyry anna güni güýje girdi.

Meýilnamanyň ikinji tapgyry Gazada täze dolanşyk ulgamynyň gurulmagyny, köp milletli güýjüň sebite ornaşdyrylmagyny we Hamasyň ýaragsyzlandyrylmagyny öz içine alýar.