Amerikanyň Birleşen Ştatlary Britaniýa, Awstraliýa we Kanada ýaly esasy ýaranlarynyň Palestin döwletini ykrar etmegini "performatiw" diýip häsýetlendirdi.
"Biz düýpli diplomatiýa alyp barýarys, performatiw çemeleşmelere üns bermeýäris. Biziň ileri tutýan ugurlarymyz belli: ýesirleriň boşadylmagy, Ysraýylyň howpsuzlygy we sebitiň parahatçylygy hem-de gülläp ösmegi" diýip, ABŞ-nyň Döwlet departamentiniň metbugat wekili ýekşenbe güni anonim ýagdaýda aýtdy we pajygaly şertler sebäpli Hamasy günäkärledi.
Bu beýanat şol günün dowamynda Angliýa, Kanada, Awstraliýa we Portugaliýa döwletleriniň Palestinany resmi taýdan ykrar eden taryhy wakasyndan soň berildi.
Angliýanyň Premýer-ministri Keir Starmer: “Ýakyn Gündogarda möwjeýän pajygaly şertlerde biz parahatçylygyň we iki döwletli çözgüt ähtimallygyny dowam etdirmek ugrunda hereket edýäris" diýdi.
Kanadanyň Premýer-ministri Mark Karni bolsa Palestin döwleti bilen Ysraýyl döwleti üçin parahatçylykly gelejegiň wada edilmegi ugrunda hyzmatdaşlyk teklip etdi.
BMG-niň Baş Assambleýasynyň dowamynda Fransiýa, Belgiýa, Lýuksemburg, Malta, Andorra we San Marino ýaly ýurtlaryň hem Palestini ykrar etmegine garaşylýar. Ol Ysraýyly we ABŞ-ny has-da gyrakladyp biler.
Ysraýylyň reaksiýasy
Ganhor Benýamin Netanýahu Ysraýylyň jogabyny ABŞ-da Prezident Donald Tramp bilen duşuşykdan soň yurduna gelip, beýan etjekdigini aýtdy.
"Size başga bir habarym bar: Bu bolmaz. Iordaniýa derýasynyň günbatarynda Palestin döwleti döredilmez," diýip, ol öz beýanatynda aýtdy.
Aşa sagçy Milli Howpsuzlyk Ministri Itamar Ben-Gwir Ysraýylyň hökümetini basylyp alnan Günbatar Şeriany anneksiýa etmäge we "Palestin häkimiýetini dolulygyna ýok etmäge" çagyrdy.
Ben-Gwir "X" sosial media ulgamyndan beren habarnamasynda, Günbatar Şerianyň anneksiýasy baradaky teklibi ministrler kabinetiniň nobatdaky mejlisinde hödürlejekdigini mälim etdi.
BMG-niň agza döwletleriniň üçden iki bölegi Palestin döwletini ykrar edýär, şol sanda geçen ýyl Irlandiýa, Ispaniýa we Norwegiýa resmi taýdan ykrar etdiler.
