Ysraýylyň harby goşuny, gabaw astyndaky Gaza soňky 4 günde guran hüjümlerinde 118 palestinlini öldürdi.
Gazadaky hökümet tarapyndan berlen beýannamada, ABŞ-nyň Prezidenti Donald Trampyň hüjümleriň bes edilmegi barada beren çagyryşyna garamazdan Ysraýylyň hüjümlerini dowam etdirýändigi nygtaldy.
Sişenbe güni berlen beýannamada, “Ysraýylyň howpsuzlyk güýçleri Prezident Trampyň hüjümleriň bes edilmegi barada beren çagyryşyna we teklibe oňyn jogap berlendigine garamazdan Gazada palestin halkyna garşy guraýan hüjümlerini dowam etdirýär” diýildi.
Beýannamada 4-nji oktýabrdan 7-nji oktýabra çenli Ysraýylyň Gazada ilatly ýerlere 230-dan gowrak hüjüm gurandygy we gyrgynçylyk edendigi nygtaldy.
Hüjümlerde zenanlar we çagalar bilen birlikde 118 adamyň öldürlendigi bellenildi.
Beýannamada hüjümlerden dolulygyna Ysraýylyň jogapkärdigi ýatladyldy.
Parahatçylyk gepleşikleri
ABŞ-nyň Tramp şenbe güni Hamasyň hüjümleriň bes edilmegi bilen arabaglanşykly 20 maddalyk ylalaşyk teklibini kabul etmeginden soň Ysraýyla Gaza guraýan hüjümlerini gyssagly bes etmegi üçin çagyryş beripdi.
Prezident Tramp ýekşenbe güni Trut Sosial arkaly beren habarnamasynda hüjümleriň bes edilmegi maksady bilen hepdäniň ahyrynda geçirlen gepleşikleriň netijeli geçendigini mälim etdi.
Ysraýyl bilen Hamas, ýekşenbe güni Müsüriň we Kataryň töwellaçylygynda Gyzyldeňiziň dynç alyş şäherçesi Şarm Al Şeýhde aýlawly gepleşiklere başlapdy.
Müsüriň Daşary işler ministri Bedr Abulati sişenbe güni beren beýannamasynda, gepleşikleriň ýesirleriň we tussaglylaryň boşadylmagy üçin amatly şertiň döredilmegini we Gaza yzygiderli ynsanperwer kömeginiň ýetirilmegini maksat edinýändigini aýtdy.
Ysraýyl 2023-nji ýylyň 7-nji oktýabryndan bäri Gaza guraýan hüjümlerinde esasy bölegi zenanlardan we çagalardan ybarat 67 müň 100 palestinlini öldürdi
Ysraýylyň hüjümleri sebäpli sebit harabalyga öwrüldi.
