ABŞ-nyň Donald Tramp bilen Müsüriň Prezidenti Sisi, Gazada iki ýyldan bäri dowam edýän söweşiň bes edilmeginden soň geçirilýän Gaza parahatçylyk sammitine ýolbaşçylyk edýär.
Ysraýyl bilen Hamasyň şu gün geçiriljek sammite gatnaşmagyna garaşylmaýar.
Ysraýyl halkara jemgyýetçiligi tarapyndan goldanýan Gazada haýsydyr bir jogapkärçilik almagy kabul etmedi, emma Palestiniň lideri sammite gatnaşar.
Türkiýäniň, Iordaniýanyň, Britaniýanyň, Germaniýanyň, Fransiýanyň, Italiýanyň, BMG-nyň we ÝB-niň liderleriniň sammite gatnaşjakdygy habar berildi.
Müsüriň Gyzyldeňiziň kenarynda ýerleşýän Şarm Al-Şeýh şäherinde geçiriljek sammitiň öňüsyrasynda şu gün Hamasyň elindäki ysraýylly 20 ýesiriň boşadylmagyna we Ysraýylyň palestinli ýüzlerçe tussaglyny boşatmagyna garaşylýar.
Dünýä liderleri näme üçin jemlenişýär?
Täze sahypa
Ysraýyl bilen Hamas, ABŞ-nyň, Arap ýurtlarynyň we Türkiýäniň basyşy netijesinde meýilnamanyň birinji tapgyry boýunça ylalaşyk gazandy.
Ysraýyl bilen Hamas çylşyrymly birnäçe meseläniň hötdesinden gelmek üçin halkara jemgyýetçiliginden we sebit ýurtlaryndan tehniki we maliýe taýdan goldawa garaşýar.
Müsür tarapyndan berlen beýannama görä, sammit ABŞ-nyň Prezidenti Donald Trampyň Gaza söweşiniň bes edilmegi üçin edýän tagallasynyň çäginde sebitde parahatçylygyň we durnuklylygyň ýola goýulmagy üçin täze sahypanyň açylmagyny maksat edinýär.
Müsür mart aýynda Gazanyň 2,3 millionlyk ilatynyň ýerinde galmagy üçin meýilnama hödürläpdi. Şol meýilnama Trampyň sebitiň boşadylmagy meýilnamasynyň ýerine taýarlandy.
Sammite ýolbaşçylyk edýän iki lideriň söweşden soňki döwür üçin täze iş meýilnamasynyň üstünde işländiklerini görkezýär.
Iki sagat dowam etmegine garaşylýan sammitde ähli kynçylyklaryň giňişleýin seljerilmegine garaşylmaýar.
Sisi bilen Trampyň sammitden soň metbugata beýannama bermegine garaşylýar.
Ylalaşygyň birinji tapgyrynyň çäginde Ysraýylly esgerler Gazanyň käbir etraplaryndan çekildi we ýüzmüňlerçe palestinliniň yzyna dolanmagyna rugsat berildi.
Ynsanperwer kömek guramalary hem sebite has köp ynsanperwer kömeginiň getirilmegi üçin taýarlyk görýär.
