Ysraýylyň Liwana guran howa hüjümlerinde azyndan 16 adam ýogaldy
Ysraýyl Liwana guran soňky hüjümlerinde ilatly ýerleri nyşana aldy.
Ysraýylyň çarşenbe güni ir ertir Liwanyň çar tarapyna guran howa hüjümlerinde azyndan 16 adam ýogaldy, 26 adam ýaralandy.
Liwanyň Milli habarlar gullugy NNA-nyň berýän habaryna görä, Ysraýyla degişli harby uçarlar paýtagt Beýrudyň Aişe Bekkar etrapçasynda bir binany nyşana aldy.
Hüjümde adam pidasynyň çekilip çekilmändigi hakynda heniz hiç hili beýannama berilmedi.
Ysraýylyň Liwanyň günortasyndaky Tire etrabynyň Hanuwiýe etrapçasyna guran hüjüminde biri saglygy goraýyş işgäri bolmak bilen 3 adam ýogaldy.
Liwanyň Günbatar Bekka sebitindäki Zellaýa etrabyna guralan hüjümde bolsa 1 adam ýogaldy, 2 adam ýaralandy.
Tire etrabynyň Al Huşa etrapçasyna guralan bombaly hüjümde bolsa 1 adam ýogaldy, 8 adam ýaralandy.
Kana etrabyna guralan howa hüjümlerinde 5 adamyň ýogalandygy, 5 adamyň hem ýaralanandygy habar berildi.
Hizbullaha degişli Al Manar teleýaýlymyna görä, Ysraýylyň Tirusdaky Çehabiýe etrabyna guran hüjüminde 6 adam ýogaldy, 7 adam ýaralandy.
Liwanyň Saglygy goraýyş ministrligi, Ysraýylyň Liwanyň günortasyndaky Bint Jubeýl etrabynyň Tebnine etrapçasyna guran hjüminde 4 adamyň ýaralanandygyny habar berdi.
Ysraýylyň 2-nji martdan bäri Liwana guraýan hüjümlerinde 570 adamyň ýogalandygy, müňlerçe adamyň ýaralanandygy nygtaldy.
Bu dartgynlyk Ysraýyl bilen ABŞ-nyň Eýrana garşy guraýan bilelikdäki hüjüminden soň has-da möwjedi.
Hüjümler sebäpli Eýranyň dini lideri Ali Hamenei bilen birlikde 1200-den gowrak adam ýogaldy.
Eýran bolsa ABŞ-nyň harby merkezlerine ýer eýeçiligini edýän Aýlag ýurtlaryna raketa we dron hüjümlerini guraýar.