Günorta Koreýanyň Goranmak ministri Ahn Gyu-Back ýurdunyň Demirgazyk Koreýa tarapyndan abanýan ýadro howplaryna garşy üstümizdäki ýylyň ahyryna çenli Koreýa Ýarymadasyna Hýunmoo-5 balistiki raketasynyň ornaşdyryljakdygyny aýtdy.

Penşenbe güni Ýonhap habarlar gullugyna beýannama beren Goranmak ministri Ahn Gyu-Back, Hýunmoo-5 raketalarynyň önümçiligine başlandygyny we önümçiligiň artdyrylmagy üçin tagalla edilýändigini nygtady.

Ministr Ahn “Ýadro ýaraglarynyň ýaýramagynyň önüni alyş şertnamasyna gol goýandygymyz üçin ýadro ýaragyna eýe bolup bilmeýäris. Emma abanýan howplara garşy degişli çäreleriň görülmegi maksady bilen Hýunmoo-5 raketalaryna eýe bolarys” diýdi.

Täsirli güýji sebäpli “äpet raketa” hökmünde tanalýan Hýunmoo-5 raketasy 8 tonnalyk konwensional söweş ujuny göterip bilýär we ýerasty gaçybatalgalary hatardan çykaryp bilýän balistki raketalardan biri.

Raketa ilkinji gezek geçen ýyl Günorta Koreýanyň ýaragly güýçleriniň döredilen gününe bagyşlanan çärelerde tanyşdyrlypdy.

Demirgazyk Koreýanyň geçen hepde geçirlen harby çärede Hwasong-20 materikara balistiki raketany tanyşdyrmagyndan soň, Günorta Koreýanyň Goranmak ministri Ahn yýu-Backyň beren beýannamalary ünsleri özüne çekdi.