ABŞ-nyň Prezidenti Donald Tramp, Gaza ylalaşygynyň gazanylmagynda uly rol oýnan Türkiýe hakynda öwgüli sözler aýty we Prezident R. T. Erdogany “ajaýyp adam” hökmünde häsiýetlendirdi.
Müsürde geçiriljek halkara Gaza sammitiniň öňüsyrasynda metbugata beýannama beren Tramp, “Türkiýe uly rol oýnady. Prezident Erdogan ajaýyp adam. Hakykatdan hem ylalaşygyň gazanylmagynda uly rol oýnady. Erdogana uly sarpa goýulýar. Türkiýe täsiri güýçli ýurt we güýçli goşuny bar”diýdi.
ABŞ-nyň Prezidenti Tramp, Gazada hüjümleriň bes edilmegi, ýesirleriň we tussaglylaryň boşadylmagy boýunça Ysraýyl bilen Hamasyň arasynda gazanylan ylalaşykda Birleşen Arap Emirlikleriniň, Kataryň, Saud Arabystanynyň, İndoneziýanyň we İordaniýanyň hem uly rol oýnandygyny belledi.
Air Fors Oneada metbugata beýannama beren Tramp, Ysraýyl bilen Hamasyň arasynda gazanylan ylalaşyga bildirilýän aladalara üns bermeýändigini aýtdy.
“Parahatçylygy ýola goýmak”
Ylalaşygyň dowam edip etmejekdigi hakyndaky soraga jogap beren Tramp, “Men dowam etjekdigine ynanýaryn. Ynsanlar çaknyşykdan ýadady” diýdi.
Trampyň Ýakyn Gündogar ýurtlaryna gurajak saparynyň ilkinji duralgasy Ysraýyl bolar.
Prezident Trampyň Tel-Awiwde ysraýylly ýesirleriň hossarlary bilen duşuşmagyna we Ysraýylyň parlamentinde çykyş etmegine garaşylýar.
Tramp duşenbe güni Müsüriň Şarm Al-Şeýh şäherinde geçiriljek Gaza parahatçylyk sammitine hem gatnaşar.
Tramp bilen Müsüriň Prezidenti Sisiniň ýolbaşçylyk etmeginde geçiriljek sammit, Gazadaky söweşiň bes edilmegini, Ýakyn Gündogarda parahatçylygyň we durnuklylygyň ýola goýulmagy üçin täze etabyň başladylmagyny maksat edinýär.
Türkiýäniň Kommunikasiýalar edarasynyň başlygy Burhanettin Duran ýekşenbe güni sosial media arkaly beren habarnamasynda Prezident Erdoganyň Sisiniň we Trampyň çakylygyna laýyklykda Gaza sammitine gatnaşjakdygyny mälim etdi.
