88 ýaşyndaky ruhany lider Watikana gaýdyp barmak üçin taýýarlyk görýär. Emma lukmanlar iň bolmanda 2 aýlyk gowulaşmak tapgyry bilen ýüz-ýüzedigini we wezipelerini azaltjakdygyny beýan etdiler.
Papa Fransisk pnewmoniýa sebäpli 5 hepdäniň dowamynda hassahanada bejergi alanyndan soň gowulaşmagy üçin iň gowy ýeriň Watikandygyny aýdan lukmanlaryň maslahatyna laýyklykda ýekşenbe güni Watikana gaýdyp barar.
Katoliki buthanasynyň 88 ýaşyndaky lideri, saglyk ýagdaýynyň hassahanadan çykjak derejede gowulaşandygyny eşitmekden şatdygyny habar berdi. Şenbe güni şol beýanaty bren lukmanlaryň biri bolan Sergio Alfieri, Papa Fransiskiň azyndan iki aýlyk gowulaşmak tapgyry bilen ýüz-ýüzedigini beýan etdi. Papa Fransiskiň günortandan soň hassahanadan çykarylmagy meýilleşdirilýär.
Watikanyň habaryna görä, Papa Fransisk hassahananyň daşynda oňa garaşýanlara ak pata berip, el galgadyp, gysgaça çykyş eder. Bu onuň 14-nji fewraldan bäri ilkinji köpçülik öňündäki çykyş bolar.
Papa Fransiskiň 14-nji fewraldan bäri hassahanada galmagy onuň wezipesinde bolan mahaly hassahanada galan iň uzak möhleti boldy we 2013-nji ýylda saýlananyndan bäri 4-nji gezek hassahana ýatyşy boldy. Saglygynyň barha erbetleşmegi bilen Fransiskiň hem özünden ozal Papa wezipesinde bolan Benedikt XIV ýaly wezipesinden çekilip-çekilmejekdigi bilen bagly öňe sürmeleriň döremegine sebäp boldy.
Dynç alyş döwri
Papanyň lukmanlary şenbe güni Rimdäki Gemelli hassahanasynda metbugat işgärleri bilen gürrüňdeş bolup, Fransiskiň saglyk ýagdaýynyň gowulaşýandygyny habar berdiler. Watikan çarşenbe güni beren beýanatynda, Papanyň kislorod maskasyz hem dem alyp bilýändigini mälim etdi.
Emma Alfieri: “Onuň saglygy öýünde has gowy dikeler, sebäbi hassahana – bu geň ýaly görünsede – saglygy dikeltmek üçin iň erbet ýer bolup biler, sebäbi ol ýerde has köp ýokanç keseller ýokuşyp biler” diýip belledi.
Lukman Papanyň ýekşenbe güni hassahanadan çykyp Watikandaky Keramatly Marta öýüne gaýdyp barjakdygyny beýan etdiler. Fransisk şol binadaky ýörite jaýda ýaşaýar. Emma Alfieri papanyň tiz wagdta wezipesine gaýdyp barmagynyň mümkin däldigini aýtdy.
Alfieri: “Dikeldiş döwri, adaty ýagdaýda, dynç alyş döwrüdir. Şonuň üçin bu döwürde onuň gündelik işlerini ýerine ýetirmegi mümkin däl” diýdi.
