Prezident Rejep Taýyp Erdogan 4-nji Antalya Diplomatiýa Forumynyň çäklerinde ýokary derejeli ikitaraplaýyn duşuşyklary geçirdi.

Erdogan, şenbe güni, Türkiyäniň diplomatik gatnaşyklary ösdürmek we halkara hyzmatdaşlygy güýçlendirmek baradaky ygrarlylygyny tassyklady.

"Bölünen Dünýäde Diplomatiýany Gaýtadan Dikeltmek" temasy bilen geçirilen forum, gepleşikler arkaly global meseleleri çözmek üçin esasy platforma öwrüldi.

Somali bilen syýasy we ykdysady raýdaşlyk

Somaliniň prezidenti Hasan Şeýh Mahmud bilen geçiren duşuşygynda Erdogan Türkiyäniň Somaliniň syýasy we ykdysady ösüşine çuňňur goldaw berýändigini beýan etdi.

Agzybirlik we hyzmatdaşlyk arkaly milli barlyşygy gazanmagyň möhümdigine ünsi çeken Erdogan, Ankaranyň Mogadişunyň durnuklylygyna we gaýtadan dikeldilmegine berýän goldawyny dowam etdirjekdigini aýtdy.

Türkiye we Gruziýa Transportda has çuňňur integrasiýany maksat edinýär

Gruziýanyň premýer-ministri Irakli Kobakhidze bilen geçiren duşuşygynda Erdogan iki ýurduň arasyndaky ösýän strategiki gatnaşyklara ünsi çekdi.

Erdogan Baku-Tbilisi-Kars demir ýolunyň ähmiýetine ünsi çekip, Türkiyäniň bu liniýanyň doly güýjünde işlemegine goldaw bermäge taýýardygyny aýtdy.

Şeýle hem, Erdogan Türkiyäniň Gruziýanyň özygtyýarlylygyny we territorial bitewiligini goldaýandygyny aýtdy we ýakyn wagtda hyzmatdaşlygy has-da ýokarlandyrjakdygyna umyt bildirdi.

Palestina we Gaza egsilmez goldaw

Palestinanyň premýer-ministri Muhammet Mustafa bilen duşuşyk geçiren Erdogan Ysraýylyň Gazadaky hüjümlerini berk tankyt etdi we Türkiyäniň uzak möhletleýin parahatçylyk üçin iki döwletli çözgüdiň ýola goýulmagy barada çagyryş berdi.

Gazanyň halkynyň göçürilmegini düýbünden ret edýändiklerini aýdan Erdogan, Türkiyäniň Gaza ynsanperwer kömegini we halkara derejesinde syýasy taýdan goramak işini dowam etdirjekdigini aýtdy.

Erdogan: "Palestinanyň halkynyň ýanyndadyrys" diýip belläp, Türkiyäniň tutanýerliligini nygtap geçdi.

Sudanyň täzeden dikeldilmegina we özygtyýarlylygyna goldaw

Erdogan, Sudanyň özygtyýarlylyk geňeşiniň başlygy Abdulfettah al-Burhan bilen geçiren duşuşygynda, soňky çaknyşyklardan soň Türkiyäniň Sudanda gaýtadan dikeldiş we kadalaşdyryş işine goldaw berjekdigini aýtdy.

Ikitaraplaýyn hyzmatdaşlygyň giňelendigini aýdan Erdogan, Ankaranyň Sudanyň territorial bitewiligine we özygtyýarlylygyna berýän ähmiýetini ýene bir gezek nygtady.

Sýerra-Leone bilen Afrikada artan hyzmatdaşlyk

Erdogan Sýerra-Leoneniň prezidenti Julius Maada Bio bilen geçiren duşuşygynda, esasanam goranyş pudagynda hyzmatdaşlygyň güýçlendirilmelidigini aýtdy.

Erdogan, Türkiyäniň özara peýdaly Afrika syýasatyna ünsleri çekip, söwda, bilim we energetika pudaklarynda hyzmatdaşlygyň ösdürmegiň möhümdigini aýtdy.

Bolgariýa bilen sebitleýin hyzmatdaşlygy ýokarlandyrmak

Bolgariýanyň premýer-ministri Rosen Želýazkow bilen geçiren duşuşygynda Erdogan, esasanam energiýa we goranyş pudagynda hyzmatdaşlygy ýokarlandyrmaga çagyrdy.

Terrorçylyga garşy göreşde bilelikdäki tagallalaryň ähmiýetine ünsi çeken Erdogan Bolgariýanyň sebitleýin howpsuzlyga we durnuklylyga has köp goşant goşmagyny isledi.

Erdogan, Ankara bilen Sofiýanyň arasyndaky raýdaşlygyň Balkanlarda uzak möhletleýin parahatçylyk we durnuklylyk üçin möhüm ähmiýete eýedigini aýtdy.

Geljege gönükdirilen diplomatiýanyň duşuşyk nokady

Antalýa diplomatiýa forumy Türkiyäniň köptaraplaýyn diplomatiýa strategiýasynyň merkezindäki platforma öwrüldi.

Global dartgynlylygyň artýan döwründe Prezident Erdogan strategiki gatnaşyklary berkitmek, parahatçylygy goramak we Türkiyäni halkara diplomatiýasynda işjeň güýç hökmünde görkezmek üçin bu forumyň möhümdigini beýan etdi.