Erdogan: Papanyň Türkiye sapary umumy gatnaşyklary pugtalandyrmak taýdan möhüm ädimdir
Papa XIV leo ilkinji daşary ýurt saparynyň çäginde ýekşenbe gününe çenli Türkiyede bolar we Stambul we Nikeýa diýlip atlandyrylýan Iznik şäherleri bilen birlikde birnäçe şähere baryp görer.
Türkiyäniň Prezidenti Rejep Taýýip Erdogan Papa XIV Leonyň Türkiye saparyny “umumy gatnaşyklary pugtalandyrýan örän möhüm ädim” hökmünde häsýetlendirdi.
Watikanyň döwlet ýolbaşçysy we katolik dünýäsiniň ruhy lideri Rim Papasy XIV Leo penşenbe güni daşary yurtlara guraýan ilkinji saparynyň çäginde Türkiyäniň Ankara şäherine geldi. Rim Papasynyň sapary Türkiyäni we Liwany öz içine alar.
Papa Türkiye Respublikasynyň Prezidentiniň çakylygy boýunça resmi saparyň çäginde ýekşenbe gününe çenli Türkiyede bolar we Ankara bilen birlikde, irki hristian taryhynda Nikeýa diýlip atlandyrylýan Iznik we Stambul şäherlerlerine baryp görer.
Prezident Köşgi tarapyndan berlen bilelikdäki beýanatda Erdogan Papanyň saparynyň sebitleýin we global dartgynlygyň güýçli döwrüne gabat gelýändigini aýtdy.
Prezident Erdogan: “Türkiyeden (Papa Leo XIV bilen bilelikde) berlen ýüzlenmeleriň hem türk-yslam dünýäsine, hem-de hristian dünýäsine ýetjekdigine we dünýäde parahatçylyk umydyny güýçlendirjekdigine ynanýaryn” diýip belledi.
"Çydamsyzlyk gapma-garşylygy döredýär"
Erdogan diskriminasiýa we parahatçylykly ýaşaýş baradaky çekişmelerin üstünde durup geçip: "Çydamsyzlyk gapma-garşylygy döredýär, gapma-garşylyk bolsa öz gezeginde bölünişigi we ýigrenji güýçlendirýär. Günbatarda yslamofobiýanyň we ksenofobiýanyň artmagy bu ýaramaz aýlawyň alamatlarydyr" diýdi.
Erdogan Türkiyäniň öz daş-töweregindäki gapma-garşylyklara, krizislere we adalatsyzlyklara garşy jogapkärçiligini öz üstüne alandygyny we parahatçylygy we adalatlylygy goramak üçin aňsat däl-de, kyn ýoly saýlandygyny nygtady.
Prezident Erdogan Papanyň parahatçylyk we dialog çagyryşlarynyň Russiýa-Ukraina urşunda diplomatik etabyň üstünligi üçin hem uly ähmiýete eýedigini aýtdy.
Türkiyäniň çaknyşygy bes etmek üçin edilýän soňky tagallalary ýakyndan gözegçilik edýändigini we zerur goldawy we kömegi bermek üçin tagalla edýändigini belledi.
Gazadaky genosid
Erdogan Gazada dowam edýän genosid barada: "Adamzat maşgalasy hökmünde Palestinanyň halkyna iň uly borjumyz adalatdyr. Bu bergini üzmegiň ýoly 1967-nji ýyldaky serhetlere esaslanýan iki döwletli çözgüdi durmuşa geçirmekdir" diýdi.
Erdogan: “Gündogar Iýerusalimiň taryhy şahsyýetine zyýan ýetirip biljek islendik agressiw herekete garşy bilelikde hereket etmäge dowam etjekdigimize ynanýaryn” diýip, nygtady.
Erdogan Ysraýylyň goşunynyň Gazadaky asuda ilatly ýerleri, şol sanda ybadathanalary we metjitleri nyşana alandygyny aýtdy we täsir ýeten ybadathanalaryň biriniň Gazadaky Katolik ybadathanasy tarapyndan dolandyrylýan Mukaddes Maşgala ybadathanasydygyny aýtdy.
Prezident Mukaddes Iýerusalim şäherinde "taryhy status-kwony gorap saklamagyň" "aýratyn möhümdigini" nygtady.