Harby resmileriň biriniň AFP habarlar agentligine beren maglumatyna görä, Kolumbiýanyň günortasynda 125 adamy alyp barýan harby uçaryň heläkçilige uçramagy netijesinde azyndan 66 adam ýogaldy, köp sanda adam ýaralandy.
“Hercules C-130” kysymly uçar Ekwadoryň günorta serhedine golaý Puerto Leguizamodan uçandan gysga wagt soň heläkçilige uçrady we ýanýan uçaryň bölekleri tokaýyň üstüne gaçdy.
Kolumbiýanyň Harby-howa güýçlerine degişli uçar Puerto Leguizamo bilen Amazonkanyň başga bir ýerine 114 harby gullukçyny we 11 ekipaž agzasyny alyp barýardy.
General Karlos Fernando Silwa Rueda uçaryň bortundaky adamlaryň umumy sanyny tassyklady, resmiler bolsa heläkçilikde häzire çenli 48 adamyň diri galandygyny habar berdiler.
Ýigrimi bir adam henizem dereksiz ýiten hökmünde hasaba alyndy.
Prezident Gustawo Petro beren ilkinji beýanatynda heläkçiligiň sebäbiniň entek belli däldigini aýtdy.
Ýurduň Goranmak ministri Pedro Sançes pajygaly heläkçilige "çuňňur gynanç" bildirdi we ýaralananlara kömek bermek üçin toparyň iberilendigini mälim etdi.
