Siriýanyň Prezidenti Ahmed Şara, Damasyň Moskwa bilen “taryhy we strategik”gatnaşyklaryny ösdürmäge taýardygyny aýtdy.

Şara çarşenbe güni Moskwada Russiýanyň Prezidenti Wladimir Putin bilen duşuşdy.

Şara bilen Putin özara duşuşykdan soň metbugata beýannama berdi.

Şara beýannamasynda “Ozal baglaşylan ähli şertnamalara we umymy taryha sarpa goýýarys we şol gatnaşyklary gaýtadan dikeltmek isleýäris” diýdi.

Siriýanyň Prezidenti Şara “Russiýa bilen ýakyndan gatnaşyk edýäris. Rus hünärmenleri Siriýanyň energetika pudagynyň ösmeginde uly rol oýnaýar” diýdi.

Üstümizdäki aýyň başynda Siriýada geçirlen saýlawlar mynasybetli Şarany gutlan Putin bolsa, Moskwanyň Damask bilen edýän gatnaşyklaryny ösdürmäge taýardygyny belledi.

Şarany Kremlde garşy alan Putin, Siriýa bilen Russiýanyň arasynda onlarça ýyldan bäri dowam edýän gatnaşyklar hakynda öwgüli sözler aýtdy.

Asadyň yzyna berilmegi

AFP habarlar gullugy siriýaly resmilerine esaslanýan habarynda, Şaranyň Russiýa gaçyp giden Başar Asadyň yzyna berilmegini talap etmek isleýändigini öňe sürdi.

Kreml, Başar Asada we maşgalasyna wezipesinden çetleşdirilmeginden bir gün soň Russiýa tarapyndan başpenalyk hukugynyň berlendigini habar beripdi.

Kreml mundan başgada Moskwada geçiriljek nobatdaky duşuşykda iki lideriň Siriýadaky rus harby bazalary hakynda pikir alyşjakdygyny mälim etdi.

Kremliň metbugat sekretary Dmitri Peskow metbugata beren beýannamasynda “Meseläniň gün tertibine getirilmegine garaşylýar” diýdi.

Moskwanyň Siriýada iki harby bazasy bar: Tartusdaky deňiz bazasy we ýurduň Ortaýer deňiziniň kenarynda ýerleşýän Hmeýmimdäki howa bazasy.