Polşa Moskwada ýokary derejeli bir rus harby razwedka ofiseriniň janyna kast etmek synanyşygynda ýurduň howpsuzlyk gulluklarynyň gatnaşandygy baradaky rus aýyplamalaryny ret etdi.
Ýerli metbugatda berlen habarlara görä, Polşanyň Harby garşy razwedka gullugynyň başlygy brigada-generaly Ýaroslaw Strozik sişenbe güni beren beýanatynda, Russiýanyň Federal Howpsuzlyk gullugynyň öňe süren aýyplamalaryny, rus halkyna gönükdirilen dezinformasiýa hökmünde häsýetlendirdi.
Rus resmiler 6-njy fewralda Moskwada Russiýanyň harby razwedka edarasy GRU-nyň orunbasary general-leýtenant Wladimir Alekseýewiň janyna kast edilmäge synanşylandygyny we hassahanada bejergi astyna alnandygyny, hujümçiniň bolsa wakanyň bolan ýerinden gaçandygyny habar berdiler.
Resmiler birnäçe wagt soň asly ukrainaly, rus raýaty bolan 66 ýaşyndaky Lýubomir Korbanyň Dubaýdan Russiýa iberilendigini we Alekseýewi ýaralamakda aýyplanandygyny mälim etdiler.
FSB hüjümiň Ukrainanyň razwedka gullugy tarapyndan meýilleşdirilendigini we Lýubomir Korbany işe çekmekde Polşanyň razwedka gullugynyň rol oýnandygyny öňe sürdi. Şeýle-de bolsa, Russiýanyň metbugaty Korbanyň Polşanyň günortasyndaky Katowiçe şäherinde ýaşaýan Polşanyň raýaty bolan oglunyň, kakasynyň Polşanyň razwedka gullugy bilen utgaşdyrylyp, işe alynmagyna kömek edendigini öňe sürdi.
Polşanyň metbugat agentligine beren interwýusynda brigada-generaly Ýaroslaw Strozik Polşanyň Russiýada we Belarussiýada adam öldürmelere we sabotažlara gatnaşýandygy baradaky aýyplamalary ret etdi. Strozik bu aýyplamalaryň Russiýanyň we Belarussiýanyň NATO we Günbatar ýurtlarynyň yzygiderli basyş astyndadygy baradaky gürrüňi goldamak üçin aýdylandygyny aýtdy.
Strozik bu aýyplamalaryň Polşanyň Goranmak ministrliginde uzak wagtlap gulluk eden rus içalysynyň Warşawada tussag edilmegi bilen bölekleýin baglanyşykly bolmagynyň mümkindigini aýtdy. Şeýle-de bolsa, ol bu beýanatlaryň esasan rus we belarus jemgyýetçiligini ýalňyşdyrmaga gönükdirilendigini beýan etdi.
Strozik şeýle hem aýyplamalaryň iri halkara habar beriş serişdeleri arkaly ýaýradylmagyny "biynjalyk ediji" hökmünde häsýetlendirdi.
Ýaroslaw Strozik Polşanyň aňtaw gulluklarynyň kanunyň çäklerinde we premýer-ministr we prezident ýaly ýokary derejeli döwlet resmileriniň syýasy gözegçiligi astynda işleýändigini nygtady.
