Asly Güwen BMG-niň Howpsuzlyk Geňeşinde “Halkara parahatçylygyny we howpsuzlygyny goramak” bilen bagly gün tertibiniň çäginde geçirilen “Ýakyn Gündogarda syýasy çözgütleriň tapylmagy: durnukly parahatçylyk üçin töwellaçylyk we dialog” atly açyk mejlisde Türkiýäniň adyndan çykyş etdi.

Güwen häzirki wagtda sebitde taryhyň iň durnuksyz döwürleriniň birini başdan geçirýändigini aýtdy.

Ol Gazada millionlarça adamyň howply we näbelli şertlerde ýaşaýandygyny belläp, Ysraýylyň ot açyşygy bes etmek baradaky ylalaşyga garamazdan öz borçlaryny ýerine ýetirmeýändigini aýtdy.

Şeýle hem Güwen Ysraýylyň Günbatar Şeriadaky syýasatlarynyň iki döwletli çözgüdi gowşadýandygyny we sebitdäki dartgynlygy güýçlendirýändigini nygtady.

Siriýada we Liwanda bolup geçýän wakalara hem ünsi çeken Güwen, soňky çaknyşyklaryň sebitdäki dartgynlygyň dessine güýçlenip bilýändigini, onuň bolsa adamlaryň janyna, dünýä bazarlaryna hem-de halkara howpsuzlygyna wehim salýandygyny aýtdy.

Güwen çykyşynda: “Ýakyn Gündogarda parahatçylygy, durnuklylygy we hyzmatdaşlygy ilerletmek diňe sebit derejesindäki zerurlyk däl, eýsem dünýä derejesindäki jogapkärçilikdir” diýip belledi.

Türkiýe töwellaçylyk tagallalaryny goldamaga taýýardyr

Asly Güwen Türkiýäniň sebitde parahatçylygy üpjün etmek ugrunda edýän diplomatik tagallalaryna hem ünsi çekdi.

Ol Türkiýäniň Gazadan Ukraina çenli, Afrika Şahyndan beýleki sebitlere çenli konstruktiw gatnaşyklary we amaly diplomatiýany goldaýandygyny aýtdy.

Gazadaky töwellaçylyk işlerinden başga-da, Türkiýäniň Eýran bilen dialogy ösdürmäge gönükdirilen başlangyçlary goldaýandygyny bellän Güwen, mundan beýläk hem sebitdäki çaknyşyklary bes etmäge gönükdirilen ähli töwellaçylyk tagallalaryna goldaw bermäge taýýardyklaryny aýtdy.

Güwen çykyşynyň ahyrynda halkara parahatçylygyny, adamyň mertebesini we howpsuzlygy goramak üçin kabul edilen halkara kadalarynyň berjaý edilmeginiň zerurdygyny nygtap, bu ugurda BMG-niň Howpsuzlyk Geňeşiniň aýratyn jogapkärçiliginiň bardygyny aýtdy.