BMG-nyň Palestinli çagalara ýardam gullugy UNRWA, penşenbe güni beren beýannamada, Gazada 650 müňden gowrak çaganyň 3 ýyldan bäri bilim almak hukugyndan mahrumdygyny mälim etdi.
UNRWA X sosial media platformasy arkaly beren habarnamasynda “Gazada çagalar yzly-yzyna 3 ýyldan bäri mekdebe gidip bilmeýär, 660 müňe golaý çaga üçin mekdepleriň açylmagy diňe bilim almak däl, eýsem şol bir wagtda çuňňur psihiki şikeslerinden saplanmak manysyny aňladýar”diýildi.
UNRWA, Gazadaky iň uly ynsanperwer kömek guramasy hökmünde şol çagalara goldaw bermäge taýardygyny mälim etdi.
UNRWA-nyň Daşarky gatnaşyklardan jogapkär ýolbaşçysy Tamara Alrifa, “UNRWA ilkinji nobatda çagalaryň bilim almaga başlamagyny isleýär” diýdi.
Ysraýylyň 2023-nji ýylyň oktýabr aýyndan bäri guran hüjümlerinde esasy bölegi zenanlardan we çagalardan ybarat 68 müňden gowrak palestinli ýogaldy, Gazanyň esasy bölegi harabalyga öwrüldi.
BMG-nyň Ynsanperwer kömek işlerini utgaşdyryş gullugy OCHA-görä hüjümler sebäpli Gazadaky mekdepleriň 97 göterimi dolulygyna ýykyldy.
Ysraýyl bilen Hamasyň arasynda geçen hepde ABŞ-nyň Prezidenti Donald Tramp tarapyndan hödürlenen meýilnamanyň çäginde ylalaşyk gazanylypdy.
Meýilnamanyň birinji tapgyry Ysraýylly ýesirleriň we Palestinli tussaglylaryň boşadylmagyny öz içine alýar.
Meýilnamanyň ikinji tapgyrynyň çäginde Gazanyň täzeden dikeldilmegi we täze dolanşyk ulgamynyň gurulmagy göz öňünde tutulýar.
