Prezident R. T. Erdogan Katarda saparda bolýar.
Erdogan saparynyň çäginde geçen hepde Ysraýylyň Doha guran hüjüminden soň nobatdan daşary ýagdaýda geçirilýän Arap-Yslam sammitine gatnaşar.
Prezident Erdogana saparynyň çäginde aýaly Emine Erdogan, Milli Howpsuzlyk gullugynyň başlygy Ibrahim Kalyn, Prezidentiň howpsuzlyk boýunça kömekçisi Akif Çagataý Kylyç, Kommunikasiýalar edarasynyň başlygy Burhanettin Duran bilen Adalat we ösüş partiýasynyň başlygynyň orunbasary Halit Ýerebakan ýoldaşlyk edýär.
Dohada geçiriljek Arap-Yslam sammitine sebitde ýerleşýän ýurtlaryň döwlet we hökümet baştutanlary gatnaşar.
Katar geçen hepde Ysraýylyň Hamasyň liderlerini nyşana alan we Hamasyň ýokary derejeli 5 ýolbaşçysy bilen kataryň howpsuzlyk güýçlerinden 1 adamyň ýogalmagyna sebäp bolan hüjümden soň Arap-Yslam sammitiniň geçirilmegi üçin çagyryş beripdi.
Kataryň Premýer-ministri we Daşary işler ministri Şyh Muhammed bin Abdurrahman Al Sani ýekşenbe güni beren beýannamasynda “Halkara jemgyýetçiligi iki ýüzli çemeleşmesinden ýüz öwürmeli we Ysraýyl eden etmişleri sebäpli jezalandyrylmaly” diýdi.
Al Sani “Şol ulgam, Katar, Liwan, Yrak, Eýran we Ýemen bilen birlikde musulman ýurtlaryna hüjüm etdi. İsleýşi ýaly hereket edýär. Gynansakda ABŞ bilen Ýewropa ýurtlary şol aksiýalara goldaw berýär” diýdi.
Katar, ABŞ we Müsür bilen birlikde Ysraýylyň 2023-nji ýylyň oktýabr aýyndan bäri Gazada guraýan we 65 müň palestinliniň ýogalmagyna sebäp bolan hüjümleriniň bes edilmegini maksat edinýän gepleşiklere töwellaçylyk edýär.
