ABŞ-nyň prezidenti Donald Tramp, Russiýanyň prezidenti Wladimir Putin bilen meýilleşdirilen sammiti netijesiz bolmak ähtimallygy sebäpli ýatyrandygyny aýtdy.
Sişenbe güni Ak tamda žurnalistlere beýanat beren Donald Tramp, maslahatyň näme sebäpli ýatyrylandygy bilen bagly soraga: "Biderek geçjek duşuşyk islemeýärin. Wagt ýitirmek islämok, şol sebäpli näme boljagyny görerin " diýip jogap berdi.
Tramp Ukrainadaky front liniýalaryny bes etjek ylalaşygy göz öňünde tutup: “Liniýanyň üstüne gidiň. Söweş liniýasyna, front liniýasyna gidiň, yza çekiliň we her kim biraz arakesme bersin, sebäbi iki ýurt biri-birini öldürýär, ýurtlaryň ikisem hepdede 5-7 müň aralygynda esgerlerinden mahrum galýar” diýip belledi.
Sişenbe güni irden Ak Tamyň resmisi Tramp bilen Putiniň arasynda meýilleşdirilýän ikinji sammitiň Döwlet sekretary Marko Rubio bilen Russiýanyň daşary işler ministri Sergeý Lawrowyň arasynda "netijeli" hökmünde häsýetlendirilen telefon söhbetdeşliginiň geçmeginden soň togtadylandygyny aýtdy.
16-njy oktýabrda Putin bilen telefon arkaly söhbetdeşlik geçireninden soň, Tramp Russiýanyň lideri bilen Wengriýanyň Budapeşt şäherinde iki hepdäniň içinde duşuşmak meýilnamasyny yglan etdi we Lawrow bilen Rubionyň duşuşygyň jikme-jikliklerini öwrenmek üçin şu hepde duşuşjakdygyny aýtdy. Resminiň sözlerine görä, şol duşuşyk hem ýatyryldy.
Bu duýdansyz üýtgeşmäniň sebäbi entek belli däldi, ýöne Russiýa Trampyň üç ýarym ýyldan gowrak dowam eden söweşinde Kreml öňdäki frontdaky liniýalaryny gorap saklamagy bes etmek baradaky teklibine garşy durýar.
Lawrow sişenbe güni žurnalistlere beren beýanatynda, gyssagly ýaraşygyň talap edilmeginiň rus we amerikan liderleriniň awgust aýynda Alýaskada geçiren sammitinde beren öňki borçnamalaryna ters gelýändigini aýtdy.
