Gazadak Raýat goranyş gullugy, Ysraýylyň Gaza şäheriniň gündogarynda ýerleşýän al-Zeýtun etrapçasynda bir ulagy duýduryş bermezden nyşana alandygyny habar berdi.
Howa hüjüminde şol bir maşgaladan 11 adamyň ýogalandygy nygtaldy.
Raýat goranyş gullugynyň metbugat sekretary Mahmud Basal, ulagda 7-si çaga, 2-si zenan 11 adamyň bardygyny mälim etdi.
Basal, 11 adamlyk Şaaban maşgalasynyň “sary çyzygy” geçen badyna hiç hili duýduryş berilmezden nyşana alynandygyny belledi.
“Täze gyrgynçylyk”
“Sary çyzyk” Ysraýylyň howpsuzlyk güýçleriniň ornaşan sebiti bilen Palestinlileriň Gazanyň içinde hereket edýän ýerlerini biri-birinden aýyrýan resmi bolmadyk serhet hökmünde bilinýär.
Hamas bilen Ysraýylyň arasynda töwellaçylaryň gatnaşmagynda gazanylan we 10-njy oktýabrda güýje giren ylalaşyk, Ysraýylyň käbir sebitlerden bölekleýin çekilmegini we “sary çyzyk” hökmünde bilinýän ýerlere ýerleşmegini göz öňünde tutýar.
Hamas, Şaaban maşgalasynyň al-Zeýtun etrapçasyndaky öýleriniň ýagdaýyny görmäge barýarka nyşana alynmagyny “täze gyrgynçylyk” hökmünde häsiýetlendirdi.
Hamas tarapyndan berlen beýannamada, Ysraýylyň ylalaşyga garamazdan asuda ilaty nyşana almaga dowam edýändigine üns çekildi.
