Çarşenbe güni ir ertir Ysraýylyň söweş sebäpli harabalyga öwrülen Gaza guran hüjümlerinde 6-sy çaga azyndan 12 palestinaly ýogaldy. Ysraýylyň hüjümlerinde ýaşaýyş jaýlary we asuda ilat nyşana alyndy.

Anadolu habarlar gullugynyň berýän habaryna görä, Gazanyň demirgazygyndaky Jibaliýa sebitinde Al Nejjar maşgalasynyň öýüni nyşana alan hüjümde 6-sy çaga 8 palestinaly ýogaldy. Köp sanly adam hem ýaralandy.

Gazanyň merkezinde ýerleşýän Bureýj bosgun düşelgesindäki ýaşaýyş jaýlaryndan birine guralan hjümde hem ataly-ogul ýogaldy.

Günortadaky Han Ýunusda bolsa asuda ilaty nyşana alan hüjümlerde 1-i zenan 2 palestinaly ýogaldy, birnäçe adam ýaralandy.

Şaýatlara görä, sebitde gözleg we halas ediş işleri dowam edýär.

Çarşenbe güni guralan bu hüjümler, Ysraýylyň mart aýynyň başyndan bäri Gaza berilýän ynsanperwer kömegini bökdemegi sebäpli azyk ýetmezçiliginiň gün saýyn agyrlaşýan günlerinde guraldy.

Ysraýylyň harby goşuny, Gaza Sektorynda 19-njy ýanwarda güýje giren ylalaşykdan soň 18-nji martda ir ertir ýaňadandan hüjüm guramaga başlady. Şol günden bäri esasy bölegi ýaşulylardan, zenanlardan we çagalardan ybarat 792 palestinaly ýogaldy, 1663 adam ýaralandy.

Ysraýylyň 2023-nji ýylyň 7-nji oktýabryndan bäri guraýan hüjümlerinde ýogalan palestinalylaryň sany bolsa 50 müň 144 adama, ýaralananlaryň sany bolsa 113 müň 704 adama ýetdi.