Türkiyäniň Daşary işler ministri Hakan Fidan, Ysraýylyň Gaza garşy genosid syýasatlary bilen baglanyşykly soňky wakalaryň we hadysalaryň ABŞ-nyň Ysraýyla täsiriniň çak edilenden azdygyny we hatda hakykatyň tersine bolup biljekdigini görkezendigini aýtdy.

Hakan Fidan ABŞ-nyň Prezidenti Donald Tramp bilen dowam edýän Gazada parahatçylyk we Siriýada durnuklylyk bilen baglanyşykly gepleşikler barada teswir berip: “Amerikanyň içerki syýasatynda kim kimiň üstünden gözegçilik edýär diýen mesele uzak wagtlap dowam edip gelýär. Soňky wakalar ABŞ-nyň Ysraýylyň syýasatlaryna çak edilenden az täsir edýändigini, hatda tersine bolup biljekdigini görkezdi” diýip belledi.

Ysraýylyň Palestinanyň topraklaryny ele salmagyndan bäri sebit üçin hemişe mesele bolup gelýändigini aýdan Hakan Fidan, ähli sebit ýurtlarynyň 1967-nji ýyldaky serhetleriň esasynda iki döwletli çözgüdi goldaýandygyny beýan etdi.

Hakan Fidan MBC MASR TW kanalyna beren beýanatynda: “Emma Ysraýyl hiç wagt iki döwletli çözgüdi hakykatdanam islemedi. Ol howpsuzlyk bahanasy bilen 1967-nji ýyldaky serhetlerden daşardaky Palestinanyň topraklaryny eýelemek syýasatyny yzygiderli alyp bardy” diýip nygtady.

Fidan: “Şu nokatda, bu mesele onlarça ýyllap Yslam dünýäsi üçin iň uly mesele bolup galdy. Soňky ýyllarda Ysraýylyň giňelmek syýasaty Palestinada dowam edýän basyşy bilen birlikde sebite resmi howp boldy” diýip habar berdi.

Fidan Dohada geçirilen gyssagly Arap-Yslam sammitiniň ähmiýetini nygtap, maslahatyň Ysraýylyň giňelmek syýasatyny öňe çykarmak taýdan möhüm bolandygyny mälim etdi.

Hakan Fidan: “Biz Gaza garşy dowam edýän genoside we Ysraýylyň Günbatar Şeriany anneksiýa etmek synanyşyklaryna garşy durmagy dowam etdireris we Palestina döwletiniň döredilmegi üçin tagalla ederis. Bu sebitleýin parahatçylyk üçin zerurdyr” diýip beýan etdi.