“Ejem Holokostdan halas boldy. Şu gün bu ýerde gören zatlarym maňa geçen asyryň wakalaryny ýatlatdy.”

Mossad gullugynyň öňki direktory Tamir Pardo Basyp alyşlyk astyndaky Günbatar Şeriýada ysraýylly gelmişekleriň eden-etdiliklerine synlamak üçin guran saparynda, şaýat bolan wakalaryny Holokost bilen deňeşdirdi.

Tamir Pardo 2011-nji ýyldan 2016-njy ýyla çenli Ysraýylyň aňtaw gullugy bolan Mossadyň direktory bolup işledi. Ysraýyl goşunynda hormatly dynç alyşa çykan brigada generaly Pardo Basyp alyşlyk astyndaky Günbatar Şeriýada ysraýylly gelmişekleriň eden-etdiliklerini we Ysraýylyň syýasatyny açyk görnüşde tankyt eden Ysraýylyň öňki howpsuzlyk işgärleriniň iň ýokary derejeli resmileriniň biridir.