Müsür, Katar we Türkiye ABŞ-nyň prezidenti Donald Tramp bilen bilelikde Gazanyň ýaraşyk şertnamasy baradaky resminama gol çekdi.

Bu resminama duşenbe güni Müsüriň Gyzyl deňziniň kenaryndaky Şarm al-Şeýhde geçirilen halkara sammitinde gol çekildi.

Tramp, Ysraýyl bilen Hamasyň ýesir alyş-çalşygyndan birnäçe sagat soň Gazadaky ýaraşyk şertnamasyny berkitmäge gönükdirilen beýannama gol çekilmegini "Ýakyn Gündogar üçin ajaýyp gün" diýip häsýetlendirdi.

Prezident Tramp sammite ýygnanan 20-den gowrak dünýä liderine ýüzlenip: "Bu, dünýä üçin ajaýyp gün, Ýakyn Gündogar üçin ajaýyp gün" diýdi.

Tramp resminama gol çekmeden ozal: “Bu resminama düzgünleri, şertleri we ençeme başga zady kesgitlär” diýdi we iki gezek “Bu resminama güýjüni gorar” diýip gaýtalady.

Gazany ýaňadandan dikeltmek konferensiýasy

Müsüriň prezidenti Abdülfettah al-Sisi öz ýurdunyň Gazanyň durkuny täzelemek boýunça konferensiýa geçirjekdigini belläp: "Müsür ýakyn günlerde Gazanyň ýaňdandan dikeldilmeginiň düýbüni tutar we hyzmatdaşlar bilen hyzmatdaşlykda ABŞ bilen işleşer we irki dikeldiş, rekonstruksiýa we ösüş konferensiýasyny geçirmegi meýilleşdirýäris" diýdi.

Şeýle hem Sisi, Gaza şertnamasynyň "adamzat taryhynda agyr bir bölümi ýapýandygyny we Ýakyn Gündogar üçin parahatçylygyň we durnuklylygyň täze eýýamyny döredýändigini" aýtdy.

Sisi şeyle hem bu şertnamanyň iki döwletli çözgüt üçin esas döreden "taryhy gün" bolandygyny hem sözüniň üstüne goşdy.