Hamaneý ABŞ hüjüm eden halatynda, sebitleýin urşuň ýüze çykyp biljekdigi barada duýduryş berdi
Trampyň uruş bilen bagly hemlelerinden soň, Tähran bilen Waşingtonyň arasyndaky dartgynlyk iň ýokary derejä ýetdi.
Eýranyň dini lideri Ali Hamaneý ABŞ-nyň Eýrana hüjüm etmeginiň sebitleýin urşuň başlanmagyna sebäp boljakdygy barada duýduryş berdi.
Hamaneý ýekşenbe güni Tähranda eden çykyşynda: “Eger ABŞ bu gezek uruş başlatsa, uruş tutuş sebite ýaýrar” diýip nygtady.
Ol Waşingtonyň Pars aýlagyna uçar göter gämilerini we harby gämilerini ýerleşdirmegini "täze zat däl" diýip häsiýetlendirdi.
Hamaneý amerikan resmileriniň geçmişde şuňa meňzeş duýduryşlary yzygiderli berendigini we "ähli wariantlaryň stoluň üstünde durandygyny’ aýdyp, harby ýoly hem şolaryň hataryna goşandyklaryny aýdandyklaryny mälim etdi.
Hamaneý ABŞ-nyň prezidenti Donald Trampa salgylanyp: "Indi bu adam biz harby gämileri getirdik we ş.m. diýip gaýtalaýar" diýip, belledi.
Ol eýranyň halkynyň şeýle zatlardan gorkmaly däldigini aýdyp: “Eýranyň halkyna bu hemleler täsir etmeýär” diýdi.
Çarşenbe güni Tramp sosial mediadan beren beýanatynda Eýrana tarap ägirt uly "harby güýjüň" barýandygyny aýtdy we Tährany dessine gepleşikleri geçirmäge çagyrdy.
Bu beýanat ABŞ-nyň harby hüjüminiň mümkindigi baradaky çaklamalary güýçlendirdi; Eýranyň resmileri berk reaksiýa bildirdiler we şondan soň sebitde güýçli diplomatik işjeňlik başlandy.