Ysraýyl Liwana guraýan hüjümlerini dowam etdirýär. Ýerli köpçülikleýin habar beriş serişdeleriniň berýän habaryna görä, Ysraýylyň Liwanyň günortasynda guran soňky hüjüminde azyndan 17 adam ýogaldy, köp sanly adam hem ýaralandy.
Liwanyň Saglygy goraýyş ministrligi sişenbe güni beren beýannamasynda Sur şäherine we töwereklerine guralan hüjümlerde 4 adamyň ýogalandygyny, 8 adamyň ýaralanandygyny mälim etdi.
Liwanyň NNA habarlar gullugy, sişenbe güni ertiriň irki sagatlarynda Mahmoudiýa etrabynyň Aishiýeh etrapçasyna guralan hüjümde 2 adamyň ýogalandygyny habar berdi.
NNA-nyň berýän habaryna görä, Arabsalim etrapçasynda bir öýe guralan hüjümde bolsa iki adam ýogaldy, bir zenan hem ýaralandy.
Habarlar gullugy Günbatar Bekaa jülgesindäki Sahmar etrapçasyna er ertir guralan hüjümde bolsa şol bir maşgaladan 3 adamyň ýogalandygyny, 1 adamyň ýaralanandygyny aýan etdi.
Ysraýyla degişli dronlaryň Msaýleh-Nabatieh ýoluny nyşana almagy sebäpli 2 adamyň ýogalandygy nygtaldy.
Ysraýyl ýaşaýyş jaýlaryny nyşana alýar
NNA-nyň berýän habaryna görä, Ysraýylyň howpsuzlyk güýçleri Sur etrabyna hüjüm gurady.
Liwanyň köpçülikleýin habar beriş serişdeleri ýurduň günortasynda 10-dan gowrak ýaşaýyş jaýynyň nyşana alynandygyny habar berdi.
Habarda hüjümlerde çekilen adam pidasy hakynda maglumat berilmedi.
Ysraýylyň harby goşuny Hizbullahyň 2-nji martda guran serhetaşa hüjüminden soň, 2024-nji ýylyň noýabr aýynda atyşygyň bes edilmegi boýunça gazanylan ylalaşyga garamazdan Liwana guraýan hüjümlerini artdyrdy.
Liwanyň berýän maglumatyna görä, şol günden bäri Ysraýyl tarapyndan guralýan hüjümlerde azyndan 2 müň 89 adam ýogaldy, 6 müň 762 adam hem ýaralandy.
