Ukrainanyň ABŞ önümi bolan “Patriot” howa hüjümlerinden goranyş ulgamynyň raketalaryny birnäçe hepde bäri Russiýanyň hüjümlerine garşy ulanyp bilmeýändigi habar berilýär.
CNN-iň howpsuzlyk sebäpli familiýasyny aýtmakdan saklanan Dmitriý atly ukrain resmisine salgylanyp beren maglumatyna görä, resmi Kiýew ABŞ-da öndürilen “Patriot” raketalaryny birnäçe hepde bäri ulanyp bilmeýär.
Ukrainaly resmi "Patriot" raketalarynyň atyşyny "alty hepde" bäri görmändigini aýtdy we atyş üçin tutujy raketalaryň bolmazlygynyň "erbet täsirleri" döredýändigini nygtady.
Ukrainaly resmi, Ýakyn Gündogardaky gapma-garşylygyň ahyrsoňy onuň ýurduna hem täsir ýetirjekdigini öňünden görendiklerini aýtdy.
Habarda onlarça ýurduň howa hüjümlerinden goranyş ulgamlaryny güýçlendirmäge çalyşmagy we “Patriot” raketalarynyň Ýakyn Gündogardaky çaknyşyklarda giňden ulanylmagy sebäpli dünýäde üpjünçilik ýetmezçiliginiň ýüze çykýandygy aýdylýar.
Ukrainanyň Prezidenti Wladimir Zelenskiý Ukrainanyň “Patriot” howa hüjümlerinden goranyş ulgamynda ulanylýan raketalary ABŞ-dan her aý aljakdygyny aýdypdy.
Ukrainanyň hökümeti şeýle hem “Patriot” howa hüjüminden goranyş ulgamynda ulanylýan raketalary üpjün etmek ýa-da şeýle raketalary öndürmek üçin ABŞ-dan zerur ygtyýarnamalary almak üçin işleri dowam etdirýändigini mälim etdi.
