Senagat we tehnologiýa ministri Mehmet Fatih Kajyr Aý taslamasynyň çägindäki senenamanyň kesgitlenendigini belläp: «Milli gibrid itiji raketa ulgamyna eýe bolan Aý enjamymyzy 2027-nji ýylyň ilkinji aýlarynda älem giňişligine uçurarys» diýdi.
Ministr Kajyr Afýonkarahisardaky Emre kölünde geçirilen 28-nji TÜBİTAK Asman Gözegçilik çäresinde žurnalistlere beýannama berdi.
Türkiýäniň Milli tehnologiýa başlangyjy maksatnamasynda älem giňişliginiň örän möhüm orun tutýandygyny aýdan Kajyr, älem giňişliginiň we kosmos tehnologiýalarynyň goranyş senagaty ýaly möhüm ugurlar üçin hem esasy strategiki infrastrukturalary emele getirýändigini aýtdy.
Prezident Rejep Taýyp Erdoganyň ýolbaşçylygynda örän möhüm işleri durmuşa geçirendiklerini nygtan Kajyr, hemra tehnologiýalary babatda BILSAT, RASAT, GÖKTÜRK-2, Türksat 6A we IMEJE taslamalary arkaly örän uly mümkinçilikleri döredendiklerine ünsi çekdi.
Kosmosa garaşsyz çykmagyň Türkiýe üçin strategiki maksat bolup durýändygyny aýdan Kajyr, Türkiýäniň raketa we roketa tehnologiýalary boýunça örän möhüm mümkinçiliklere eýedigini belledi.
ROKETSAN, TÜBİTAK SAGE we Delta V kompaniýalarynyň hem bu ugurda örän möhüm işleri alyp barýandygyny aýdan Kajyr sözüni şeýle dowam etdirdi:
«Bu işleriň netijesinde indi öz hemralarymyzy öz mümkinçiliklerimiz bilen kosmosa çykarmak üçin ulanjak raketalarymyzy öndürmek boýunça maksada ädimme-ädim ýakynlaşýarys. Kosmosa garaşsyz çykmak üçin kosmos porty infrastrukturasyna eýe bolmagy hem ileri tutulýan ugurlaryň biri hökmünde kesgitledik.»
