Eýranyň Daşary işler ministri Abbas Arakçi, Russiýanyň Daşary işler ministri Sergeý Lawrow bilen telefon arkaly söhbetdeşlik geçirdi.
Abbas Arakçi telefon söhbetdeşliginde Ysraýylyň Liwana guraýan hüjümleriniň dolulygyna bes edilmelidigini nygtady.
Eýranyň Daşary işler ministrliginden çarşenbe güni berlen beýannamada, iki kärdeşiň telefon söhbetdeşliginde özara gatnaşyklar bilen birlikde sebitara we halkara meseleler hakynda pikir alyşandygy nygtaldy.
Abbas Arakçi telefon söhbetdeşliginde rus kärdeşi Lawrowa ABŞ bilen gazanylan ylalaşyk hakynda giňişleýin maglumat berdi.
ABŞ bilen Eýranyň arasynda gazanylan ylalaşyga kanagatlanma bildiren Sergeý Lawrow, Russiýanyň ady agzalýan ylalaşygyň şertleriniň ýerine ýetirilmegine doly goldaw berýändigini belledi.
Iki kärdeş mundan başgada halkara jemgyýetçiliginiň we BMG-nyň Howpsuzlyk geňeşiniň sebitde durnuklylygyň we parahatçylygyň ýola goýulmagy üçin edilýän tagallalara goldaw bermelidigini nygtady.
ABŞ bilen Ysraýylyň Eýrana guran bilelikdäki howa hüjümlerinden soň fewral aýynyň ahyrynda dartgynlygyň möwjemegi sebäpli resmi Tährana görä 3 müňden gowrak adam ýogaldy.
Eýran howa hüjümlerine Ysraýyla we ABŞ-nyň Aýlag ýurtlaryndaky harby bazalaryna hüjüm guramak bilen gaýtawul görkezdi we Ormuz bogazyny ýapdy.
Resmi Waşington bilen Tähran Pakistanyň töwellaçylyk etmeginde 8-nji aprelde atyşygyň bes edilmegi boýunça wagtlaýyn ylalaşyk gazandy.
Ysraýylyň 2-nji martdan bäri Liwana guraýan hüjümlerinde müňlerçe adam ýogaldy we ýaralandy. 1 milliondan gowrak adam hem ýaşaýan ýerini terk etdi.
