Ysraýylyň harby güýçleri basylyp alnan Günbatar Şerianyň Ramallah şäheriniň golaýyndaky Silwad şäherçesinde geçirilen reýdde 15 ýaşly palestinaly çagany öldürdi.
Esgerler geçirilen reýdde hakyky oklar, göz ýaşardýan gazlar we ses çykaryjy granatalary ulandylar, ýüze çykan çaknyşykda Ýamen Samed Hamed atly 15 ýaşly çaga atyldy. Bu habary penşenbe güni Palestinanyň WAFA habarlar agentligi ýerli habar çeşmelerine esasalanyp berdi.
Habar çeşmeleri Ysraýylyň harby güýçleriniň ýaralanan çagany alyp gitjek tiz kömek ulagynyň wakanyň bolan ýerine ýetmegine päsgel berendigini, soňra çagany birnäçe wagt ýerde ýatyrandyklary, soň bolsa lukmanlaryň oňa ýetmegine rugsat berendigini aýtdylar.
Ramallah şäherindäki Palestinanyň Lukmançylyk kompleksi birnäçe wagt soň çaganyň ýogalandygyny mälim etdi.
Palestinanyň habar çeşmeleriniň maglumatlaryna görä, 2023-nji ýylyň oktýabr aýyndan bäri Ysraýylyň hüjümleri basylyp alnan Günbatar Şeriada artmak bilen birlikde, şol seneden bäri 1062-den gowrak palestinaly öldürildi, 10300-den gowrak adam ýaralandy.
Şu ýylyň iýul aýynda Halkara Kazyýet Ysraýylyň Palestina territoriýalaryny basyp almagyny bikanun diýip yglan edip, Günbatar Şeriadaky we Gündogar Iýerusalimdäki ähli ilatly nokatlaryň boşaldylmagyny talap edýän möhüm karar çykardy.
