Ministr Fidan: “Ýewropanyň köp ýurtlary duşuşygyň Türkiyede, Prezidentimiziň ýer eýeçiliginde geçirilmeginiň Prezident Trampyň sammite gatnaşmagyny mümkin eden iň möhüm faktordygyny aýdýarlar. Eger Prezidentimiz bolmadyk bolsa, Türkiye bolmadyk bolsa, Tramp gelmezdi” diýdi.
Türkiyäniň daşary işler ministri Hakan Fidan 7-8-nji iýulda Ankarada geçiriljek NATO-nyň sammiti bilen bagly beýanat berip: "Örän möhüm meseleler bar we ABŞ-nyň prezidenti bolmazdan duşuşykda olary çözmek mümkin däl. Köp Ýewropa ýurtlary duşuşygyň Türkiyede, biziň Prezidentimiziň ýer eýeçiliginde geçirilmeginiň Prezident Trampyň sammite gatnaşmagyny mümkin edýän iň möhüm faktordygyny aýdýarlar" diýip belledi.
Daşary işler ministri Hakan Fidan Russiýa saparynyň dowamynda Türkiyäniň metbugatyna gün tertibiniň ileri tutulýan ugurlary barada beýanat berdi.
Fidan Russiýadaky duşuşyklarynyň ikitaraplaýyn gatnaşyklarda we sebitleýin meselelerde bilelikde işlemek babatynda hiç hili kynçylygyň we uly şikaýatlara sebäp boljak meseläniň ýokdugyny görkezendigini we iki ýurduň hem mümkin bolan ähli ugurlarda hyzmatdaşlyk etmek isleýändigini aýtdy.
Russiýa-Ukraina urşy we gepleşiklerdäki çemeleşme
Ministr Fidan: "Russiýadaky duşuşyklarymyň dowamynda rus resmileriniň Ukraina baradaky garaýyşlarynyň üýtgemändigini gördüm. Olar: 'Donetsk meselesi çözülmezden hiç hili zadyň bolmagy mümkin däl' diýýärler" diýip belledi.
Ysraýylyň sebitdäki agressiw we ekspansionistik syýasaty
Fidan Ysraýylyň agressiw pozisiýasynyň bütin dünýä üçin kynçylyga öwrülendigine ünsi çekip, munuň diňe Türkiyäniň meselesi bolmandygyny nygtady.
Fidan: "Ysraýyl sebitde weýrançylyk isleýär. Ol käbir ýurtlary basyp alyp, terrorçylykly hereketler etmek isleýär. Munuň global howpsuzlyk babatda we ykdysady ulgamda täsiri bar. Ysraýylyň barha diplomatik reaksiýalara sezewar bolýandygyny görýäris. Bu diplomatik reaksiýanyň netije berjekdigine we sebitimizdäki ähli ýurtlaryň parahatçylykda, durnuklylykda we gülläp ösüşde ýaşajakdygyna umyt edýäris" diýip nygtady.
