Resmiler Kiýewiň giň gerimli ballistik raketa hüjümine sezewar bolandygyny we azyndan bäş adamyň ýaralanandygyny habar berdiler.
Ukrainanyň paýtagtynda güýçli partlamalaryň sesleri eşidildi we hökümet binalarynyň golaýyndaky ýaşaýyş jaýlaryna zeper ýetdi. Onlarça adam şäheriň merkezindäki metro beketlerindäki gaçybatalgalara sygyndylar.
Kiýew şäheriniň harby dolanşygynyň başlygy Timur Tkaçenko Telegramdan beren beýanatynda: "Paýtagt giň gerimli ballistik raketa hüjümine sezewar boldy" diýip belledi.
Şäher häkimi Witaliý Kliçko hüjümlerde bäş adamyň ýaralanandygyny, olaryň biriniň hassahana ýerleşdirilendigini belläp, Şewçenko, Dnepr we Podilskiý etraplarynda ýangynlaryň bolandygyny we ýaşaýyş jaýlaryna zeper ýetendigini habar berdi.
Ukrainanyň resmileri we ABŞ-nyň Kiýewdäki ilçihanasy ozal Russiýanyň özüniň Ukrainanyň gündogaryndaky sebitlerde amala aşyrlan ölüm howply hüjümleriň jogapkärlerini "jezalandyrjakdygy" barada beyanat bereninden soň, paýtagta giň gerimli hüjümleriň guralmagynyň mümkindigi barada duýduryş beripdiler.
Şenbe güni Ukrainanyň prezidenti Wladimir Zelenskiý we ABŞ-nyň Kiýewdäki ilçihanasy Russiýanyň giň göwrümli howa hüjümleriniň howpy barada duýduryş beripdiler.
Zelenskiý: “Biz Kiýew bilen birlikde Ukrainanyň territoriýasyna dürli görnüşli ýaraglary, şol sanda Oreşnik raketasyny ulanyp, umumy hüjüme taýýarlyk görülýändiginiň alamatlaryny görýäris” diýip duýdurypdy.
“Oreşnik” ýadro boýegolowkasyny göterip bilýän Russiýanyň giperses raketasy hökmünde tanalýar.
Kiýew hem öz güýçleriniň Russiýanyň gözegçiligindäki gündogar territoriýasyna uçarmansyz howa ulagy hüjümini amala aşyrmagyndan soň hüjümiň boljakdygyny öňünden bilipdi. Moskwa hüjümiň uniwersitetiň umumy ýaşaýyş jaýyna degip, azyndan 18 adamyň ölümine sebäp bolandygyny aýtdy.
Penşenbe gijesinden anna güni irdene çenli bolan uçarmansyz howa ulagy hüjümleri Ukrainanyň soňky aýlardaky iň heläkçilikli hüjümleriň biri boldy. Russiýa tarapyndan basylyp alnan Lugansk sebitiniň Starobilsk şäherindäki hüjümde şeýle hem 42 adam ýaralandy.
Habar berlişine görä, ölenleriň ýa-da dereksiz ýitenleriň aglabasy 2003-nji we 2008-nji ýyllaryň aralygynda doglan ýaş gyzlardan ybarat.
Ukraina bolsa asuda ilaty nyşana alandygyny ret edip, front liniýasyndan takmynan 65 kilometr uzaklykda, Starobilsk sebitinde ýerleşýän Russiýanyň uçarmansyz howa ulagy birikmesine zarba salandygyny habar berdi.
