Pakistanyň harby goşunynyň metbugat sekretary Ahmed Şerif Çaudry, ýurdunyň Saud Arabystanynyň howpsuzlygy üçin ähli taraplaýyn goldaw berjekdigini mälim etdi.
“Arab Nýus” kanalyna beýannama beren Çaudry, Ýemendäki Husileriň Saud Arabystanyna guran hüjümleri barada durup geçdi.
Çaudry “Pakistan ähli taraplaýyn Saud Arabystanyna goldaw berýär. Haram metjidiniň, Nebewi metjidiniň we Saud Arabystanynyň howpsuzlygy üçin ähli taraplaýyn tagalla ederis. Saud Arabystanly doganlarymyzyň talap eden we zerur görýän ähli kömegini bereris” diýdi.
Pakistanyň halkynyň Saud Arabystanyndaky doganlary bilen birlikde hereket edýändigine ünsi çeken Çaudry “Gysgaça aýdanymyzda biz bärde we Saud Arabystanyny ähli hüjümlere garşy goramaga dowam ederis” diýdi.
Husileriň Saud Arabystanyna guraýan hüjümleri
Ýemendäki Husiler, soňky günlerde Saud Arabystanyna garşy guraýan dron we raketa hüjümlerini artdyrdy.
Husiler 16-njy sentýabrda Saud Arabystanynyň Ýanbu şäherinde ýerleşýän Aramko desgasy bilen birlikde Hamis Muşaýt howa bazasyna ballistiki raketa we dron hüjümini gurandygyny mälim edipdi.
Saud Arabystanynyň öňbaşçylygyndaky Arap Koalisiýasy bolsa Husileriň Hamis Muşaýt, Abha we Taif şäherlerine guran raketa we dron hüjümlerinde asuda ialtdan 13 adamyň ýaralanandygyny, 7 öýe we 2 ulaga zeper ýetirlendigini mälim edipdi.
Saud Arabystanly ýolbaşçylar 16-njy sentýabrda Mekge şäheriniň howa giňişligine girmäge çalşan dronyň howa goranyş ulgamlary arkaly hatardan çykarlandygyny aýan etdi.
