Müsüriň Gyzyldeňiziň kenarynda ýerleşýän Şarm Al-Şeýh şäheri duşenbe güni halkara parahatçylyk sammitine ýer eýeçiligini eder.

Sammite Müsüriň Prezidenti Abdulfettah as-Sisi bilen ABŞ-nyň Prezidenti Donald Tramp ýolbaşçylyk eder.

Müsür tarapyndan şenbe güni berlen beýannamada, sammite 20-den gowrak ýurduň lideriniň gatnaşjakdygy nygtaldy.

Beýannamada sammitiň Gazadaky söweşiň bes edilmegini, Ýakyn Gündogarda parahatçylygyň, howpsuzlygyň we durnuklylygyň ýola goýulmagy üçin täze tapgyryň başladylmagyny maksat edinýändigi nygtaldy.

Sammitiň ABŞ-nyň Prezidenti Donald Trampyň sebitde parahatçylygyň ýola goýulmagy we dünýädäki çaknyşyklaryň bes edilmegi üçin edýän tagallalarynyň çäginde geçiriljekdigi bellenildi.

Tramp, çarşenbe güni beren beýannamasynda, Ysraýyl bilen Hamasyň 29-njy sentýabrda hödürlän Gazadaky hüjümleriň bes edilmegi, ysraýylly ähli ýesirleriň we palestinli 2 müň tussaglynyň boşadylmagy we Ysraýylyň howpsuzlyk güýçleriniň tapgyrlaýyn sebitden çekilmegi baradaky 20 maddalyk meýilnama boýunça ylalaşyk gazanandygyny mälim edipdi.

Meýilnamanyň birinji tapgyry anna güni ýerli wagt boýunça sagat 12.00-da güýje girdi.

Meýilnamanyň ikinji tapgyry Gazada täze dolanşyk ulgamynyň gurulmagyny, palestinlilerden we musulman ýurtlaryň esgerlerinden ybarat howpsuzlyk güýjüniň sebite ornaşdyrylmagyny we Hamasyň ýaragsyzlandyrylmagyny göz öňünde tutýar.

Ysraýylyň 2023-njy ýylyň oktýabr aýyndan bäri guran hüjümlerinde esasy bölegi zenanlardan we çagalardan ybarat 67 müň 600-dan gowrak adam ýogaldy, Gaza harabalyga öwrüldi.