Türkiýäniň Daşary işler ministri Hakan Fidan, penşenbe güni Türkiýäniň günortasynda ýerleşýän syýahatçylyk merkezi Antalýada Siriýanyň Prezidenti Ahmed al Şara bilen duşuşdy.
Diplomatik çeşmeleriň berýän habaryna görä, Hakan Fidan Antalýa Diplomatiýa forumynyň öňüsyrasynda Siriýanyň Prezidenti Ahmed al Şara tarapyndan kabul edildi.
Şu ýyl bäşinjisi geçirilýän Antalýa diplomatiýa forumy döwlet we hökümet baştutanlarynyň, daşary işler ministrleriniň we halkara guramalaryň wekilleriniň gatnaşmagynda anna güni öz işine başlar.
Ýekşenbe gününe çenli dowam etjek forum Türkiýe Respublikasynyň Prezidenti R. T. Erdoganyň goldaw bermeginde, Daşary işler ministrligi tarapyndan “Geljegi kesgitlemek, näbellige garşy göreşmek” temasy bilen geçirilýär.
